ამერიკის შეერთებული შტატების მხარდაჭერის, ჩვენი ქვეყნების მჭიდრო თანამშრომლობის ერთ-ერთი ყველაზე თვალსაჩინო გამოხატულებაა ათასწლეულის გამოწვევის კომპაქტი, რომელიც დიდი წარმატებით ხორციელდება საქართველოში, - ამის შესახებ საქართველოს პრემიერ-მინისტრმა „ათასწლეულის გამოწვევის ფონდი-საქართველოს" საქმიანობის წლიურ ანგარიშზე სიტყვით გამოსვლისას განაცხადა.

მთავრობის ადმინისტრაციის ინფორმაციით, გიორგი კვირიკაშვილმა ამერიკის შეერთებული შტატების ელჩს და ამერიკის მთავრობას მადლობა გადაუხადა ათასწლეულისგამოწვევის კომპაქტის ფარგლებში გაწეული მხარდაჭერისთვის და ოცდახუთწლიანი სტრატეგიული პარტნიორობისთვის.

პრემიერის თქმით, საქართველოს ეკონომიკური წინსვლისთვის უაღრესად მნიშვნელოვანია ადამიანური კაპიტალის განვითარების ხელშეწყობა, რა მიზანსაც ემსახურება ათასწლეულის გამოწვევის კომპაქტი.

„ჩვენთვის განსაკუთრებულ მნიშვნელობას იძენს განათლების სფეროს ამ მასშტაბით მხარდაჭერა, განსაკუთრებით მაშინ, როდესაც ჩვენ გამოვაცხადეთ განათლება, როგორც ნომერ პირველი პრიორიტეტი ჩვენი ხელისუფლებისთვის. 140 მილიონი დოლარის კომპაქტის ფარგლებში განხორციელებული საქმიანობის შედეგად, მილიონ შვიდასი ათასი საქართველოს მოქალაქის ცხოვრება შეიცვლება უკეთესობისკენ. 2016 წლის შედეგებს შორის განსაკუთრებით თვალსაჩინოა სან დიეგოს სახელმწიფო უნივერსიტეტის პროგრამები, რომლებიც ჩვენს ახალგაზრდებს ამზადებს მსოფლიო დონის კონკურენტუნარიან პროფესიონალებად. გარდა ამისა, უკვე გვაქვს პროფესიული განათლების თანამედროვე პროგრამა, რომლის განვითარებისთვის 12 მილიონი დოლარი გამოიყო. ასევე, გვაქვს რეაბილიტირებული, თანამედროვე ლაბორატორიებით აღჭურვილი 12 სკოლა ჩვენი ქვეყნის რეგიონებში. კომპაქტი ითვალისწინებს ჩვენი მასწავლებლების პროფესიული განვითარების ხელშეწყობასაც. მინდა, განსაკუთრებული მადლობა გადავუხადო ათასწლეულის გამოწვევის ფონდს, რომელიც ამ ძალიან დიდ საქმეს ახორციელებს და ყველა მის პარტნიორს - განათლების სამინისტროს, პედაგოგებს, პროფესორებსა და სტუდენტებს," - აღნიშნა პრემიერმა.

გიორგი კვირიკაშვილის თქმით, მისასალმებელია ინოვაციებითა და ახალი ტექნოლოგიებით ახალგაზრდების მზარდი ინტერესი. პრემიერ-მინისტრმა ახალგაზრდების ინოვაციურ იდეებს სახელმწიფოს მხრიდან სრული მხარდაჭერა აღუთქვა.

„ჩემზე ძალიან დიდ შთაბეჭდილებას ახდენს ინოვაციებისა და ახალი ტექნოლოგიების მიმართულებებისადმი ახალგაზრდობის უდიდესი ინტერესი და მივესალმები ყველა მათგანის წამოწყებას. სახელმწიფოს სახელით, აღუთქვამ მხარდაჭერას თითოეულ ასეთ ინიციატივას. მინდა, ასევე ყველა დავპატიჟო ტექნოლოგიურ პარკში, რომელიც ერთი წელია, რაც გაიხსნა და რომლის კარიც ღიაა ყველა დაინტერესებული ახალგაზრდისთვის," - განაცხადა პრემიერმა.

გიორგი კვირიკაშვილმა ამერიკის შეერთებულ შტატებთან თანამშრომლობის კიდევ უფრო გაღრმავების იმედი გამოთქვა და აღნიშნა, რომ ამერიკელი პარტნიორების დიდი დახმარებითა და თანამიმდევრული ნაბიჯებით შესაძლებელი გახდება თვისებრივი ცვლილებების შეტანა ქვეყნის ცხოვრებაში.

ათასწლეულის გამოწვევის ფონდის დირექტორმა მაგდა მაღრაძემ ღონისძიების მონაწილეებს ათასწლეულის გამოწვევის კომპაქტის 2016 წლის საქმიანობის მიმოხილვა წარუდგინა. დამსწრე საზოგადოებას ასევე სიტყვით მიმართეს საქართველოს ვიცე-პრემიერმა, განათლებისა და მეცნიერების მინისტრმა ალექსანდრე ჯეჯელავამ და აშშ-ის ელჩმა საქართველოში იან კელიმ.

140 მილიონი აშშ დოლარის მეორე კომპაქტს საქართველოში ათასწლეულის გამოწვევის ფონდი ახორციელებს. კომპაქტი ითვალისწინებს 2019 წლის ჩათვლით პროექტების განხორციელებას საინჟინრო, ტექნოლოგიური და საბუნებისმეტყველო განათლების ხარისხისა და ადამიანური კაპიტალის განვითარების მიზნით.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

NYT: OpenAI-ის ხელოვნური ინტელექტის აგენტებმა აშშ-ის მთავრობის ვებსაიტებს კომპანიას ინფორმირების გარეშე შეუტიეს

ტრამპმა გამოაქვეყნა ჰორმუზის სრუტის რუკა, რომელსაც „ტრამპის სრუტე“ უწოდა

სენატორთა ჯგუფმა ტრამპს მოუწოდა, გააუქმოს პუტინის მოწვევა G20-ის სამიტზე

პუტინი: რუსეთი მზად იყო უკრაინასთან მოლაპარაკებები არჩევნების შემდეგ განაახლოს