იუსტიციის მინისტრის თეა წულუკიანის ვიზიტი აზერბაიჯანის რესპუბლიკაში დაიწყო.

სამინისტროს ინფორმაციით, საქართველო აზერბაიჯანს საკუთარ გამოცდილებას გაუზიარებს ღია მმართველობის კუთხით გატარებული რეფორმების შესახებ. საქართველოსა და აზერბაიჯანის იუსტიციის მინისტრები იმსჯელებენ იმ სამომავლო ღონისძიებების შესახებ, რომელთაც ორი ქვეყნის იუსტიციის სამინისტროები მოცემულ სფეროში განახორციელებენ.

აზერბაიჯანის რესპუბლიკას „ღია მმართველობის პარტნიორობის" წევრობა 2016 წლის მაისიდან შეჩერებული აქვს. საქართველოსთვის, როგორც „OGP"-ის თანათავმჯდომარე ქვეყნისთვის, რომელიც მიმდინარე წელს ამ პარტნიორობის თავმჯდომარეობას საფრანგეთისგან გადაიბარებს, მეტად მნიშვნელოვანია, რომ აზერბაიჯანმა − საქართველოს სტრატეგიულმა პარტნიორმა და მეზობელმა ქვეყანამ − „ღია მმართველობის პარტნიორობის" სრულფასოვანი წევრობა დაიბრუნოს. აზერბაიჯანისათვის წევრობის შეჩერების  გადაწყვეტილება შარშან  კეიპტაუნში იქნა მიღებული და საქართველომ, როგორც მმართველი კომიტეტის წევრმა, ამ გადაწყვეტილებას მხარი არ დაუჭირა.

ვიზიტის ფარგლებში თეა წულუკიანი აზერბაიჯანის იუსტიციისა და საგარეო საქმეთა მინისტრებს შეხვდება. დაგეგმილია ვიზიტები აზერბაიჯანის მეჯლისში (პარლამენტში), აგრეთვე, შეხვედრა ხელისუფლებისა და სამოქალაქო საზოგადოების დიალოგის ღია მმართველობის პლატფორმის წევრებთან. თეა წულუკიანი, ასევე, პატივს მიაგებს აზერბაიჯანის ეროვნული ლიდერის − ილჰამ ალიევის, ხსოვნას.

„ღია მმართველობის პარტნიორობა" აშშ-ისა და ბრაზილიის პრეზიდენტების ერთობლივი ინიციატივაა, რომელიც მთავრობებისა და სახელისუფლებო შტოების მეტ გამჭვირვალობას გულისხმობს. 2016 წელს საქართველო პარტნიორობის თანათავმჯდომარე ქვეყნად აირჩიეს, მიმდინარე წელს კი საფრანგეთისგან თავმჯდომარე ქვეყნის სტატუსს გადაიბარებს.

ღია მმართველობაში წარმატებული პოზიციების გამო 2013 წლის აგვისტოში საქართველო მმართველი კომიტეტის წევრად აირჩიეს − აღმასრულებელ კომიტეტში ჩვენს ქვეყანას იუსტიციის მინისტრი წარმოადგენს; 2013 წლის 1 ნოემბერს „ღია მმართველობის პარტნიორობის" ყოველწლიურ სამიტზე ლონდონში ქართული რეფორმა საჯარო ინფორმაციის ხელმისაწვდომობის სფეროში 7 ყველაზე წარმატებულ პროექტს შორის დაასახელეს; 2015 წლის ივნისში კი ქვეყანა „ღია მმართველობის პარტნიორობის" ევროპის რეგიონული კონფერენციის მასპინძელი ქვეყანა გახდა.

(NS)

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ბილ გეითსი: ხელოვნური ინტელექტის წესებზე შეთანხმება ბირთვული იარაღის შეზღუდვაზე უფრო რთული იქნება

ელენე ხოშტარია - ვივამედის კლინიკიდან ვბრუნდები რუსთავის ციხეში - მკურნალობის პირველი ეტაპი დასრულებულია

პენიტენციური სამსახური უარყოფს რეჟიმის პატიმარ არჩილ მუსელიანცის ბრალდებებს

ევროკავშირის წარმომადგენლობა - ევროკავშირი მტკიცედ უჭერს მხარს საქართველოს დამოუკიდებლობას, სუვერენიტეტსა და ტერიტორიულ მთლიანობას