დღევანდელ შეხვედრაზე საია გამოვიდა ინიციატივით, რომ პრეამბულაში ქვეყნის ევროპულ მისწრაფებებზე ჩანაწერი გაკეთდეს, რასაც როგორც მომხრეები ასევე მოწინააღმდეგეები ჰყავდა, - ამის შესახებ ახალგაზრდა იურისტთა ასოციაციის თავმჯდომარე ანა ნაცვლიშვილმა საკონსტიტუციო კომისიის ფარგლებში შექმნილი სასამართლოსა და ადამიანის უფლებებზე მომუშავე ჯგუფის შეხვედრის დასრულების შემდეგ ჟურნალისტებს განუცხადა.

მისივე თქმით, იდეა ჩანაწერის პრეამბულაში გაჩენაზე საიას ეკუთვნის.

"იდეა ჩანაწერის პრეამბულაში გაჩენაზე საიას ეკუთვნის, რაზეც დღეს ვისაუბრეთ კიდეც. იყვნენ ადამიანები, რომლებიც ამ იდეას ემხრობოდნენ, თუმცა მას ასევე ჰყავდა მოწინააღმდეგეებიც. დღეს რაიმე საკითხთან დაკავშირებით საბოლოო შეთანხმება არ მომხდარა. საკითხები, რომლებიც აზრთა სხვადასხვაობას იწვევს, უნდა მოხდეს მათი სამუშაო რეჟიმში კონკრეტულ ფორმულირებებში გარდასახვა, შემდეგ უკვე ჯგუფი იმსეჯელებს და კენჭს უყრის კონკრეტულ ფორმულირებებს”, - განაცხადა ნაცვლიშვილმა.

როგორც საია-ს თავმჯდომარემ განაცხადა, სამუშაო ჯგუფში ერთ-ერთი საკითხი, რომელიც განიხილებოდა სოციალურ სახელმწიფოს და კონსტიტუციაში მსგავსი სახის ჩანაწერის გაჩენას ეხებოდა. მისივე განცხადებით, მათი იდეაა, კონსტიტუციაში ჩაიწეროს ადამიანის უფლება ღირსეულ საცხოვრებელ პირობებზე და ჯანდაცვის სათანადო სტანდარტზე.

”წამოიჭრა იდეა, რომ კონსტიტუციის პირველ თავში გაჩნდეს სამი მუხლი, რომელიც ცალ-ცალკე განსაზღვრავს და განამტკიცებს სამ იდეას. ეს არის დემოკრატიული, სამართლებრივი და სოციალური სახელმწიფოს იდეა. ჩვენ, როგორც უფლებადაცვითი ორგანიზაცია ბოლომდე გავუწევთ ადვოკატირებას იმ იდეას, რომ კონსტიტუციამ უნდა განუსაზღვროს სახელმწიფოს და ხელისუფლების სამივე შტოს, რომ ის არის არამხოლოდ დემოკრატიული და სამართლებრივი, არამედ სოციალური სახელმწიფოც, როდესაც ხელისუფლებას აქვს მთელი რიგი ვალდებულებები იზრუნოს ადამიანის სოციალურ და ეკონომიკურ უფლებებზე და ეს უფლებები იყოს ხელშესახები, რეალური და არა მხოლოდ სადღაც წიგნებში ჩაწერილი. მაგალითად, ძალიან სერიოზული პრობლემა, რომელიც საზოგადოებას აწუხებს ახლა არის ის, რომ შრომის პირობები ძალიან მძიმე და საშიშია დასაქმებული ადამიანებისთვის. ჩვენ არ გვაქვს ეფექტური მექანიზმები, იმისთვის, რომ შრომის უსაფრთხო უფლება იყოს დაცული. ჩვენი იდეაა კონსტიტუციაში ჩაიწეროს ასევე ადამიანის უფლება ღირსეულ საცხოვრებელ პირობებზე, ასევე ჯანდაცვის სათანადო სტანდარტზე და სხვა”, - დასძინა ნაცვლიშვილმა. 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

რომის პაპი ჟურნალისტებს - მიხარია, რომ აქ ხართ, კარგი გაშუქება ყველგან და ყველასთვის მნიშვნელოვანია

თიბისი კონცეპტის მხარდაჭერით ამირ კაკაბაძის საიუბილეო წიგნი გამოიცა

Transparency International Georgia - მიხეილ სააკაშვილის სახელი შეტანილი იქნება ჩვენი ორგანიზაციის მიერ შედგენილი პოლიტიკური პატიმრების სიაში

რუსეთი სამშენებლო კომპანიების გაკოტრების ტალღამ მოიცვა