საქართველოსა და დიდი ბრიტანეთის  გაერთიანებულ სამეფოს შორის არსებული თანამშრომლობის ფორმატმა - „უორდროპის დიალოგმა" სტრატეგიული ფორმატის  სახე შეიძინა და დღეიდან „უორდროპის ქართულ-ბრიტანული სტრატეგიული დიალოგი" ეწოდა.

საგარეო საქმეთა სამინისტროს ინფორმაციით, აღნიშნული გადაწყვეტილება მხარეებმა „უორდროპის დიალოგის" მესამე რაუნდის ფარგლებში მიიღეს, რომელიც თბილისში დღეს გაიმართა.

საქართველოს საგარეო საქმეთა მინისტრობის კანდიდატის მიხეილ ჯანელიძის შეფასებით, დღეიდან „უორდროპის დიალოგი" რომელიც ქართულ-ბრიტანული ურთიერთობების  დღის წესრიგს მოიცავს, პარტნიორობის ახალ საფეხურზე  -  სტრატეგიული დიალოგის ფორმატში გადავიდა. 

„მინდა, ხაზი გავუსვა, რომ ქართულ-ბრიტანული ურთიერთობები, ჩვენი ორმხრივი ძალისხმევით, წარმატებით ვითარდება და ახალ სიმაღლეებს იძენს. ბოლო წლების განმავლობაში ერთობლივად გადადგმული ნაბიჯები რეალურად მოწმობს ორ ქვეყანას შორის ჩამოყალიბებული თანამშრომლობის სტრატეგიულ მნიშვნელობას. სახელმწიფო მინისტრის ვიზიტიც ცხადყოფს, რომ გაერთიანებული სამეფო, როგორც მეგობარი და პარტნიორი ქვეყანა, საქართველოსთან მჭიდრო და ინტენსიური თანამშრომლობის შემდგომი განმტკიცების ერთგული რჩება“, - განაცხადა მიხეილ ჯანელიძემ  გაერთიანებული სამეფოს ევროპისა და ამერიკის საკითხებში სახელმწიფო მინისტრის სერ ალან დუნკანის საქართველოში ვიზიტის ფარგლებში გამართული პრესკონფერენციის დროს.

მისი შეფასებით გაერთიანებული სამეფო უაღრესად მნიშვნელოვან როლს ასრულებს საქართველოს დემოკრატიული განვითარების, უსაფრთხოებისა და თავდაცვისუნარიანობის უზრუნველყოფის პროცესში.

დღესვე ცნობილი გახდა, რომ „უორდროპის სტრატეგიულ დიალოგში" გაჩნდა  ახალი მიმართულება რაც ითვალისწინებს  ორი ქვეყნის ანალიტიკურ წრეებსა და სამოქალაქო საზოგადოების წარმომადგენლებს შორის თანამშრომლობის პლატფორმას.

ჯანელიძემ ასევე აღნიშნა ბრიტანეთის მხარდაჭერის მნიშვნელობა საქართველოს ევროპული და ევროატლანტიკური ინტეგრაციის მიმართ. შეხვედრაზე განიხილეს საქართველოსა და რეგიონში არსებული გამოწვევები. მიხეილ ჯანელიძემ მადლობა გადაუხადა გაერთიანებულ სამეფოს  საქართველოში კონფლიქტის მშვიდობიანი მოგვარებისა და საერთაშორისო საზოგადოების პოზიციის კონსოლიდაციის კუთხით გაწეული ძალისხმევისთვის.

ხაზი გაესვა რუსეთის ფედერაციის დესტრუქციულ პოლიტიკას, რომელიც მიმართულია საქართველოს ოკუპირებული ტერიტორიების ფაქტობრივი ანექსიისკენ. ასევე მიმოიხილეს "უორდროპის დიალოგის" ფარგლებში მიმდინარე თანამშრომლობის სხვა საკითხები .

ცნობისთვის, ორმხრივი პოლიტიკური დიალოგის ფორმატი  საქართველოსა და დიდი ბრიტანეთის გაერთიანებულ სამეფოს შორის 2014 წელს დაფუძნდა. იგი ქართულ-ბრიტანული თანამშრომლობის საკითხთა ფართო სპექტრის განხილვას ემსახურება და განიხილება ​პოლიტიკურ, უსაფრთხოების,  თავდაცვის,  ეკონომიკის,  კულტურისა და, განათლების  სფეროში თანამშრომლობის საკითხები.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ანგარიშის თანახმად, ევროკავშირი საკმარისად სწრაფად და ეფექტურად არ აშენებს თავის თავდაცვით შესაძლებლობებს

მაკრონმა ტრამპი გააფრთხილა, რომ აშშ-ის ნავთობის ექსპორტის შეჩერება ფასების ზრდას გამოიწვევდა.

ზელენსკიმ განაცხადა, რომ „ანკორიჯის შეთანხმებები“ მოლაპარაკებებში აღარ განიხილება

ევროკავშირი სანქციებსა და ვიზების შეზღუდვებს ამზადებს, რათა რუსებმა გლობალურ სპორტში დაბრუნება ვერ შეძლონ