ჟვანია: ძალიან მცირეა იმ ჯარისკაცების რაოდენობა, რომლებიც ხმას დისლოკაციის ადგილის მიხედვით მისცემენ

2016-09-23 14:36:27, 726 ნახვა

პოლიტიკა

ცენტრალური საარჩევნო კომისიის თავმჯდომარის თამარ ჟვანიას განცხადებით, წინასწარი ინფორმაციით, ძალიან ბევრი სამხედრო მოსამახურე არჩევნებზე ხმას რეგისტრაციის ადგილის მიხედვით მისცემს და სპეციალურ სიაში შეყვანილი ჯარისკაცების რაოდენობა ძალიან მცირე იქნება.

თუმცა, როგორც ჟვანიამ ჟურნალისტებს განუცხადა, სპეციალური სიები ყველა ოლქში დადგენილ ვადაში, არჩევნებამდე რამდენიმე დღით ადრე დამტკიცდება და გაირკვევა, ზუსტად რამდენი ჯარისკაცი მისცემს ხმას რეგისტრაციის ადგილის მიხედვით და რამდენი-დისლოკაციის ადგილის მიხედვით:

"ყველა სამხედრო ნაწილის მეთაურმა არჩევნებამდე 25 დღით ადრე, შესაბამის საარჩევნო კომისიებს მიაწოდა ინფორმაცია სპეციალურ სიაში შესაყვან ამომრჩეველთა შესახებ, რომლებიც დისლოკაციის ადგილის მიხედვით მისცემენ ხმას. ისინი შედიან სპეციალურ სიებში. ეს ადამიანები მიემაგრებიან ყველაზე ახლომდებარე ჩვეულებრივ სამოქალაქო უბანს. სპეციალური სიები ყველა ოლქში დამტკიცდება არჩევნებამდე რამდენიმე დღით ადრე და იქნება ცნობილი, რამდენი სამხედრო მოსამსახურე იქნება შეყვანილი კონკრეტულ უბანზე. თუმცა, წინასწარი ინფორმაციით, ძალიან ბევრი სამხედრო მოსამახურე ხმას მისცემს რეგისტრაციის ადგილის მიხედვით და ძალიან მცირეა ის რაოდენობა, რომლებიც სპეციალურ სიაში იქნებიან შეყვანილი და დისლოკაციის ადგილის მიხედვით მისცემენ ხმას",-განაცხადა ცესკო-ს თავმჯომარემ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან