სტოლტენბერგი: ნატო-მ არაერთხელ აჩვენა, რომ რუსეთის წინააღმდეგობის მიუხედავად, მაინც ახერხებს გაფართოებას

2016-09-07 21:24:57, 814 ნახვა

პოლიტიკა

ნატომ არაერთხელ აჩვენა, რომ რუსეთი წინააღმდეგობის მიუხედავად, მაინც ახერხებს გაფართოებას, - ამის შესახებ ნატოს გენერალურმა მდივანმა იენს სტოლტენბერგმა საერთაშორისო კონფერენციაზე ”ევროპის ცვალებადი გეოსტრატეგიული ლანდშაფტი ვარშავის სამიტის შემდეგ” განაცხადა.

როგორც მან აღნიშნა, რუსეთს ვეტოს შესაძლებლობა არ გააჩნია.

”რუსეთი ნატოს გაფართოებას ყოველთვის ეწინააღმდეგებოდა. ისინი ეწინააღმდეგებოდნენ ბალტიისპირეთის ქვეყნების გაწევრიანებას, ვარშავის პაქტის წევრების გაწევრიანებას. რუსეთი ახლახან ნატოში მონტენეგროს მიღებასაც აპროტესტებდა, მაგრამ ნატომ არაერთხელ აჩვენა, რომ რუსეთი წინააღმდეგობის მიუხედავად, მაინც ახერხებს გაფართოებას. ეს ადასტურებს, რომ რუსეთს ვეტოს შესაძლებლობა არ გააჩნია”, - განაცხადა იენს სტოლტენბერგმა.

მისივე თქმით, ნატოს კარი ღიაა, რაც ნატომ არაერთგზის დაადასტურა. მან ამ კონტექსტში, საქართველოსთან მიმართებით, ყურადღება რეფორმების გატარების აუცილებლობაზე გაამახვილა.

”რასაც ამჟამად საქართველოში ვაკეთებთ, უაღრესად მნიშვნელოვანია ქვეყნის უსაფრთხოებისთვის. გვაქვს წვრთნები, ვეხმარებით საქართველოს, განახორციელოს სტრუქტურების მობილიზაცია, პოტენციალის გაძლიერება. ჩვენ გვინდა გავაძლიეროთ საქართველოს თავდაცვისუნარიანობა. საქართველოში ბევრად მეტი ნატოა წარმოდგენილი, ვიდრე იყო მანამდე და ნატოშიც ბევრად მეტი საქართველოა წარმოდგენილი. საქართველომ ნამდვილად უნდა გააგრძელოს რეფორმების გატარება, მაგრამ საჭიროა მოთმინება. ასევე უნდა იყოთ რეალისტურები. საჭიროა კონსენსუსის მიღწევა. ნატოს კარი ნამდვილად ღიაა”, - განაცხადა ნატოს გენერალურმა მდივანმა.