დეპუტატ მურმან დუმბაძის განცხადებით, აჭარაში რწმუნებულად ზურაბ პატარაძის დანიშვნის შესახებ საქართველოს პრეზიდენტის განკარგულება ყალბია.

როგორც „ექსპრესნიუსს“ დუმბაძემ განუცხადა, პრეზიდენტმა პარტიებთან კონსულტაციები დღეს დილით დაიწყო და არ შეიძლებოდა ეს დოკუმენტი გუშინდელი რიცხვით ყოფილიყო შედგენილი. მისივე თქმით, გუშინ აჭარის უმაღლეს საბჭოში არავინ იცოდა, რომ პრეზიდენტი ზურაბ პატარაძის რწმუნებულად დანიშვნას აპირებდა.

 „საქართველოს პრეზიდენტი უკვე კონსტიტუციის მიღმა მოქმედებს. მან აჭარის უმაღლეს საბჭოში 11 ხმა ვერ მოაგროვა და ამიტომ აკეთებს ამ გადათამაშებას. იგი მთელი დღის განმავლობაში აჭარის უმაღლესი საბჭოს ფრაქციებთან აწარმოებდა მოლაპარაკებებს, მას მოლაპარაკებების დაწყების უფლება ქონდა იმ შემთხვევაში, თუ რწმუნებული გადადგებოდა. რადგან ვერ მიიღო 11 კაცის მხარდაჭერა, ამ გზით დანიშნა რწმუნებული. საქართველოს პრეზიდენტი არღვევს საქართველოს კონსტიტუციას. ხაბაძემ 6 ივლისს შეიწყვიტა უფლებამოსილება და გადადგა. ამ შემთხვევაში საქართველოს პრეზიდენტი ვალდებულია, 10 დღის ვადაში, პრემიერთან და აჭარის უმაღლესი საბჭოს პარტიებთან კონსულტაციის შემდეგ წარადგინოს ახალი კანდიდატურა“, - აღნიშნა დუმბაძემ.

მისივე განმარტებით, აჭარის მთავრობის უფლებამოსილების შეწყვეტა 3 შემთხვევაში ხდება: 1 - თუ გადადგა აჭარის მთავრობა ან თავმჯდომარე; 2 - თ ის გადააყენა აჭარის უმაღლესმა საბჭომ; 3 - თუ ის გადააყენა საქართველოს პრეზიდენტმა.

დუმბაძე გიორგი მარგველაშვილის ქმედებას კონსტიტუციურ თაღლითობად აფასებს.

 „ტყუილია ეს დოკუმენტი, ეს არის ყალბი და ამას სამხარაულის ექსპერტიზაზე გავიტანთ, მე მაგათ გავანადგურებ. არავითარი გუშინდელი განკარგულება რწმუნებულის დანიშვნის შესახებ არ ყოფილა. პრეზიდენტმა დილის 9 საათზე დაიწყო კონსულტაციები, მედეა ვასაძეს ხმების მიღებაზე ეხვეწა, მაგრამ უარი მიიღო, ვერ მიიღო საჭირო რაოდენობის ხმები და სხვა გზით წავიდა. კონსტიტუციური გზით წავიდა, მაგრამ გაყალბებული დოკუმენტით. პრეზიდენტს რომ გადაეყენებინა ხაბაძე შეეძლო დაენიშნა ახალი კანდიდატურა. ახლა რა მოხდა - ხაბაძის 6 ივლისის განცხადება გადადგომის შესახებ პრეზიდენტმა არ დააკმაყოფილა და იგი თავად გადააყენა, მაგრამ ამ გადაყენებასაც საკუთარი მტკიცებულება ჭირდება. გადაყენება შეუძლია პრეზიდენტს, თუ მისი ქმედებები არღვევს საქართველოს ტერიტორიულ მთლიანობას და თუ თავმჯდომარე საკუთარ უფლებამოსილებას ვერ ახორციელებს. რატომ არ დააკმაყოფილა 6 ივლისის განცხადება და რატომ გადააყენა ახლა? ანუ ეს არის კონსტიტუციური თაღლითობა. რწმუნებულის დანიშვნის შესახებ 13 ივლისის არავითარი დოკუმენტი არ არსებობს. გუშინ უმაღლეს საბჭოში რწმუნებულის შესახებ არავინ იცოდა. თუ გუშინ დანიშნეს, დღეს რატომ გაიმართა კონსულტაციები? ეს არის ყალბი დოკუმენტი“, - განაცხადა მურმან დუმბაძემ.

შეგახსენებთ, რომ დღეს საქართველოს პრეზიდენტმა ზურაბ პატარაძე აჭარაში რწმუნებულად დანიშნა. ამასთან, მან პატარაძის კანდიდატურა აჭარის უმაღლეს საბჭოს რეგიონის მთავრობის თავმჯდომარის პოსტზე წარუდგინა და იმედი გამოთქვა, რომ მას საბჭო მხარს დაუჭერს.

საქართველოს პრეზიდენტის განკარგულება N 13/07/03

საქართველოს პრეზიდენტის წარდგინება N9468  

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ალიევმა გაათავისუფლა საფრანგეთის ორი მოქალაქე რომლის გამოც ორი რუსი ოლიგარქი სანქციების სიიდან ამოიღეს

80 000-მდე აბონენტს, მათ შორის თბილისის რამდენიმე უბანს, მცხეთას, ნატახტარს, წიწამურსა და წეროვნის დევნილთა დასახლებას, წყალმომარაგება 36 საათით შეეზღუდება

გორდულაძე – ევროკავშირში უნდა აწყობდეთ, რომ ჩიხში შესული ურთიერთობებიდან გამოსავალი თავადვე მოძებნონ

წითლიძე- აფხაზეთში ჯერ კიდევ არის რუსული ნარატივი, რომ აფხაზებსა და ქართველებს შორის უნდა იყოს მტრობა