მარგველაშვილი მერაბიშვილზე: თუ მისი უფლებები არაკვალიფიციურმა სამართალდამცველმა შელახა, ამიტომ ის უდანაშაულოა?!

2016-06-27 23:18:38, 699 ნახვა

პოლიტიკა

"თუ მერაბიშვილის უფლებები შელახა არაკვალიფიციურმა სამართალდამცველმა, ამიტომ ის უდანაშაულოა?!" - ამის შესახებ საქართველოს პრეზიდენტმა გიორგი მარგველაშვილმა ტელეკომპანია "კავკასიის" ეთერში განაცხადა.

მარგველაშვილის განცხადებით, იმის გამო, რომ სტრასბურგის ადამიანის უფლებათა ევროპულმა სასამართლომ ვანო მერაბიშვილთან მიმართებაში მისი უფლებების დარღვევა დაადგინა, ეს არ ნიშნავს, რომ ის პრეზიდენტმა უნდა შეიწყალოს.

”საინტერესო პოლიტიკურ რეალობაში ვცხოვრობთ. ამ წელს ძირითადი პოლიტიკური ძალები, ”ქართული ოცნება” და ”ნაციონალური მოძრაობა” გვთავაზობს ასეთ პოლიტიკურ რეალობას, რომ ვანო მერაბიშვილი და ლევან მურუსიძე არიან მსხვერპლები. ეს ორი პოლიტიკური პარტია გვთავაზობს საზოგადოებას ასეთ პოლიტიკურ დისკუსიას, რათა ამაზე ვიმსჯელოთ”, - განაცხადა გიორგი მარგველაშვილმა.

მისივე განცხადებით, ასეთ ვითარებას 4 წლის წინ ვერავინ წარმოიდგენდა.

”სტრასბურგი ამობობს, რომ მერაბიშვილს რაღაც უფლებები შეელახა. თუ მას უფლებები შეელახა, ეს უნდა იყოს გამოძიებული და იმ ადამიანებმა, ვინც ეს გააკეთა პასუხი უნდა აგონ. ეს არის ერთი თემა და მეორეა შეწყალება. რაზე ვსაუბრობთ დღეს? რა პოზიციითაა ჩამოყალიბებული, რომ მერაბიშვილი უნდა შევიწყალო? იმიტომ, რომ მისი უფლებები შელახა, სავარაუდოდ, არაკვალიფიციურმა სამართალდამცველმა თუ არ ვიცი ვინ, ამიტომ მერაბიშვილი უდანაშაულოა?!”, - განაცხადა პრეზიდენტმა.