ხვალ თბილისის ზოოპარკში შესვლა უფასო იქნება

2016-06-12 19:24:25, 655 ნახვა

საზოგადოება

წყალდიდობის წლისთავზე, 13 ივნისს, თბილისის ზოოპარკში შესვლა უფასო იქნება. ზოოპარკში მთელი დღის განმავლობაში შემდეგი საქველმოქმედო ღონისძიებებია დაგეგმილი:

სისხლის ჩაბარების საქველმოქმედო აქცია „გაიღე სისხლი სიცოცხლის გადასარჩენად“

ნატალია კვანტალიანის სახელობის სისხლის ცენტრალური ბანკის მიერ ორგანიზებული სისხლის ჩაბარების საქველმოქმედო აქცია. სისხლი მიეწოდებათ ძუძუს კიბოთი დაავადებულ და სისხლის ონკოლოგიურ პაციენტებს, ახალშობილებს, ბავშვებს, მშობიარეებს, ავტოავარიებში დაზარალებულ ავადმყოფებს, ქირურგიულ და სოციალურად დაუცველ პაციენტებს. აქციაში მონაწილეობა ნებისმიერ მსურველს შეუძლია. 12:00 – 18:00

საქველმოქმედო აქცია „GAUფრთხილდი“ – 13 ივნისი

ქართულ-ამერიკული უნივერსიტეტის (GAU) სტუდენტების ინიციატივითა და პარტნიორი ორგანიზაციების მხარდაჭერით, ზოოპარკში გაიმართება საქველმოქმედო აქცია ,,GAUფრთხილდი’’. გაიყიდება სხვადასხვა ბრენდირებული სუვენირები, ხელნაკეთი ნივთები, წიგნები და 13 ივნისისადმი მიძღვნილი სიმბოლოები. შემოსული თანხა გადაირიცხება თბილისის ზოოპარკის დახმარების საქველმოქმედო ფონდში, სტიქიით დაზარალებულთა ფონდში და თამაზ ელიზბარაშვილის ძაღლთა თავშესაფარში. სტუმრებს ელით სიმბოლური საჩუქრები და გათამაშება. აქციას უერთდებიან მოძრაობის თეატრისა და პანტომიმის თეატრის მსახიობები, მოხალისე სტუდენტები და მეგობარი კომპანიების წარმომადგენლები. 12:00 – 20:00

საბავშვო კუთხე „ზოოპარკის პატარა მეგობრები“

საბავშვო კუთხეში პატარები დახატავენ, ფურცლებზე დატოვებენ ხელის ფერად ანაბეჭდებს და ცარცით მოხატავენ მოედანს. პარალელურად მოეწყობა ბავშვების ნახატების გამოფენა. 13:00

ფოტოგამოფენა „ყველგან, სადაც სამშობლოს ვჭირდებით“

თავდაცვის სამინისტროს ორგანიზებული ფოტოგამოფენა ასახავს შეიარაღებული ძალების როლს სტიქიურ უბედურებებთან ბრძოლაში. გამოფენაზე წარმოდგენილი იქნება 13 ივნისის წყალდიდობის სალიკვიდაციო სამუშაოების ამსახველი ფოტოები. 14:00

საქველმოქმედო გამოფენა-გაყიდვა „ზოოლაივი“

ტრაგედიის წლისთავთან დაკავშირებით გაიმართება მხატვარ ირინე ჩუტკერაშვილის ნამუშევრების გამოფენა-გაყიდვა. წარმოდგენილი 35 ნახატი ცხოველების თემაზეა შექმნილი და 13 ივნისის სტიქიის გამოძახილია. შემოსული თანხა გადაირიცხება თბილისის ზოოპარკის დახმარების საქველმოქმედო ფონდში.

ბავშვებს დაურიგდებათ სამახსოვრო სუვენირები ზოოპარკისგან და მხარდამჭერი კომპანიებისგან: Maika.ge, „სნო“, სადისტრიბუციო კომპანია „მზიური“ – შოკოლადი „ლინდტი“, FRIXX.