თიბისი გალერეამ არტ-პროექტს „შეყავი თავი გალერეაში" უმასპინძლა

2016-05-06 15:39:53, 882 ნახვა

საზოგადოება

ვიზუალ-არტისტის თეზი გაბუნიას განახლებული არტ-პროექტი „შეყავი თავი გალერეაში" ერთი დღით თიბისი გალერეაში გამოიფინა.

გამოფენაზე მისულ სტუმრებს საშუალება ჰქონდათ დაეთვალიერებინათ ერთის ნაცვლად, უკვე სამი ცნობილი გალერეის საგამოფენო სივრცე: ლუვრი (პარიზი), ტეიტ მოდერნი (ლონდონი), გაგოსიანის გალერეა (ნიუ იორკი). მოცემული გალერეების ანალოგიური მინი მოდელები ერთი დღის განმავლობაში თიბისი გალერეაში იყო წარმოდგენილი.

თეზი გაბუნიას ორიგინალური არტ-პროექტი დამთვალიერებელს შესაძლებლობას აძლევს პირდაპირი მნიშვნელობით თავი შეყოს საგამოფენო სივრცეში, გადაიღოს ფოტო რუბენსის, ჰერსტის, ლიხტენშტეინის და სხვა ცნობილი მხატვრების ნამუშევრებთან ერთად და თავადაც გახდეს საგამოფენო ექსპონატი.

საღამოს მუსიკალურად აფორმებდა ელექტრონულ მუსიკა TeTe Noise-ის შესრულებით.

თეზი გაბუნიას არტ-პროექტი „შეყავი თავი გალერეაში" უკვე ერთი წელია არსებობს. ინსტალაცია თავდაპირველად ბათუმის თანამედროვე ხელოვნების ცენტრში გამოიფინა. მოგვიანებით, პროექტი ქვეყნის ფარგლებს გასცდა და ექსპოზიციის ამსახველი ფოტომასალა ონლაინ არტ გალერეაში "Art People Gallery" (სან ფრანცისკო, აშშ) გამოიფინა.