მაჭავარიანი ვაშაძის წასვლაზე: ვინც ვერ აკეთებს საქმეს ის ეძებს მიზეზს, რომ ახსნას თავისი უსაქმურობა

2016-05-05 14:17:25, 751 ნახვა

პოლიტიკა

ვაშაძის სურვილი იყო, რომ აუცილებლად ყოფილიყო სიის ათეულში, რაც გაზიარებული არ იქნა, ამიტომ მან დაასწრო მოვლენებს და სიის ათეულის გამოქვეყნებამდე პარტია დატოვა, - ამის შესახებ „ერთიანი ნაციონალური მოძრაობის“ ერთ-ერთმა ლიდერმა მიხეილ მაჭავარიანმა „ექსპრესნიუსს“ განუცხადა.

როგორც მაჭავარიანმა განაცხადა, ვინც ვერ აკეთებს საქმეს ის ეძებს მიზეზს, რომ ახსნას თავისი უსაქმურობა. ვისაც საქმის კეთება უნდა საშუალებას ეძებს.

„პარტიის სამდივნომ გამოაქვეყნა პოზიცია, რასაც მე ვერაფერს ვერ დავამატებ. მას შეეძლო ვინც უნდოდა ის დაესახელებინა, ეს მისი პოზიციაა. ვინც ვერ აკეთებს საქმეს ის ეძებს მიზეზს, რომ ახსნას თავისი უსაქმურობა. ვისაც საქმის კეთება უნდა საშუალებას ეძებს. ამაზე მეტს არაფერს ვიტყვი. მას ნებისმიერი გვარის დასახელება შეეძლო. იმ განცხადებაში, რომელიც პარტიის პოლიტსაბჭოს სამდივნომ გაავრცელა“, - აცხადებს მაჭავარიანი.

მიხეილ მაჭავარიანი ხაზგასმით ამბობს, რომ გიორგი ვაშაძეს პარტიულ სიაში გარანტირებული ადგილი არ ჰქონია.

„პარლამენტში გარანტირებული ადგილი არც ვაშაძეს და არც მაჭავარიანს არ აქვს. ეს არის ერთ-ერთი ფაქტი, რითაც შემიძლია დაგიდასტუროთ თუ რამდენად მართალია ეს კაცი. რა თქმა უნდა პარტიაში სიებთან დაკავშირებით აზრთა სხვადასხვაობა იყო. პარტიის პოლიტსაბჭოზე საპარლამენტო სიის ფორმირების პრინციპი დავამტკიცეთ, სადაც ვთქვით, რომ პირველ ათეულში იქნებიან მხოლოდ ბაქრაძე და მელია. დანარჩენი 8 იქნება საზოგადოებისთვის ცნობილი სახეები, მაგრამ ისეთი პირები ვინც პოლიტიკაში აქამდე ჩართული არ ყოფილა. ვაშაძის სურვილი იყო, რომ აუცილებლად ყოფილიყო სიის ათეულში, რაც გაზიარებული არ იქნა, ამიტომ მან დაასწრო მოვლენებს და სიის ათეულის გამოქვეყნებამდე პარტია დატოვა“, - განუცხადა „ექსპრესნიუსს“ მიხეილ მაჭავარიანმა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან