საქსტატის ინფორმაციით, ივლისში 6.5%-იან ეკონომიკურ ზრდაში მნიშვნელოვანი წვლილი ტრანსპორტის და დასაწყობების, ინფორმაცია და კომუნიკაციის, ხელოვნების, გართობა და დასვენების და ვაჭრობის სექტორებმა შეიტანეს.

რაც შეეხება ეკონომიკის სექტორებს, სადაც გასულ თვეში კლების ტენდენცია დაფიქსირდა, სტატისტიკის ეროვნული სამსახური დამმუშავებელი მრეწველობის და მშენებლობის დარგებს გამოყოფს.

საქსტატის აღმასრულებელი დირექტორის მოადგილემ პაატა შავიშვილმა დარგობრივ ჭრილში ზრდის და კლების მიზეზები განმარტა.

„დამმუშავებელი მრეწველობის სექტორში კლების ტენდენციები ძირითადად დაკავშირებული იყო ლითონის ნაკეთობების შემცირებასთან. შემცირებულია ასევე ტანსაცმლის წარმოების მოცულობის მაჩვენებელიც.

მშენებლობის სექტორში კლება, ძირითადად, დაკავშირებული იყო სამოქალაქო მშენებლობის შემცირებასთან. კერძოდ, შემცირებულია ხიდების და გვირაბების, გზების და ავტობანების, ასევე გამანაწილებელი საინჟინრო ობიექტების მშენებლობა.

რაც შეეხება სექტორებს, სადაც ზრდის ტენდენცია დაფიქსირდა - ტრანსპორტის და დასაწყობების სექტორში ზრდა, ძირითადად, დაკავშირებულია დასაწყობების და დამხმარე სატრანსპორტო საქმიანობების, ასევე საჰაერო, სამგზავრო და სატვირთო ტრანსპორტის მომსახურების მოცულობის ზრდასთან;

ინფორმაციის და კომუნიკაციის სექტორში ზრდას, ძირითადად, განაპირობებს კომპიუტერული დაპროგრამების, კონსულტირების და მათთან დაკავშირებული საქმიანობების მომსახურების მოცულობის ზრდა.

ვაჭრობის სექტორში ზრდა, ძირითადად, განაპირობა მსუბუქი ავტომობილებით საცალო ვაჭრობამ. აღსანიშნავია, რომ 2025 წლის ივლისში წინა წლის შესაბამის პერიოდთან შედარებით, დაახლოებით, 1.2%-ით არის გაზრდილი მსუბუქი ავტომობილების რეექსპორტი. გარდა ამისა, გაზრდილია საკვები პროდუქტებით, სასმელებით, თამბაქოს ნაწარმით და ფარმაცევტული საქონლით საცალო ვაჭრობის მაჩვენებლები.

ხელოვნების, გართობის და დასვენების სექტორებში ზრდა კი, ძირითადად, დაკავშირებული იყო სხვადასხვა სახის კულტურული ღონისძიების ორგანიზებასთან და შესაბამისი საქმიანობით დაკავებული კომპანიების ბრუნვის მოცულობის ზრდასთან“, - განმარტა პაატა შავიშვილმა.

ცნობისთვის: 7 თვეში საქართველოს ეკონომიკა 8%-ით გაიზარდა. უშუალოდ ივლისში კი - 6.5%-ით.

ავტორი: ექსპრესნიუსი,

სოციალური ქსელები

მაკრონმა სტარმერს მადლობა გადაუხადა და საფრანგეთსა და ბრიტანეთს შორის თანამშრომლობის გაგრძელება გამოაცხადა

ბრიტანეთის პრემიერ-მინისტრი თანამდებობიდან გადადგა

პოლონეთმა ზელენსკის მიერ დაბრუნებული „თეთრი არწივის ორდენის“ მიღება დაადასტურა

გვარამია ენმ-ზე - ხალხი ერთ პარტიაშია და ბრიფინგებით, სატელევიზიო ეთერებით და სტატუსებით ელაპარაკება ერთმანეთს და წყევლის და აგინებს