[„ქართული ოცნების“ წარმომადგენლებმა] გადაწყვიტეს, რომ აქციის მონაწილეების დასჯის და რეპრესიების უფრო მეტად გამძაფრების მიზნით გამოიყენონ კანონმდებლობის კიდევ ერთხელ ცვლილება და ეს კანონმდებლობა უფრო მკაცრი გახადონ, - ასე გამოეხმაურა საია-ს თავმჯდომარე, ნონა ქურდოვანიძე „ქართული ოცნების“ მიერ დაანონსებულ ინიციატივას, რომლის თანახმადაც, საკანონმდებლო ცვლილებების გამკაცრება იგეგმება.

მისივე თქმით, „ქართული ოცნების“ მიზანია, რომ კიდევ უფრო რეპრესიული გახდეს კანონმდებლობა.

„ეს არის რეპრესიული კანონმდებლობის კიდევ ერთი მცდელობა, ტალღა, რომ დამატებით, კიდევ უფრო რეპრესიული გახდეს კანონმდებლობა. მათ შორის, ერთ-ერთი ინიციატივა, რომელიც გააჟღერეს ეხებოდა, ადმინისტრაციული პატიმრობის ვადის გაზრდას 60 დღემდე. მე მინდა საზოგადოებას შევახსენო, რომ პატიმრობის ვადა ადმინისტრაციული სამართალდარღვევათა კოდექსში იყო 90 დღე და „ქართული ოცნება“ ამაყობდა სწორედ იმით, რომ მათ ეს შეცვალეს და 15 დღემდე დაადგინეს. ამას წერდნენ სხვადასხვა ანგარიშებში და მიუთითებდნენ, როგორც ჰუმანურ გადაწყვეტილებას და ადამიანის უფლებების დაცვისთვის მიმართულ ნაბიჯს. როგორც ჩანს, მათ საერთოდ უარი თქვეს, მათ შორის ამ საკუთარ სიტყვებზე და ახლა გადაწყვიტეს, რომ აქციის მონაწილეების დასჯის და რეპრესიების უფრო მეტად გამძაფრების მიზნით გამოიყენონ კანონმდებლობის კიდევ ერთხელ ცვლილება და ეს კანონმდებლობა უფრო მკაცრი გახადონ, რათა ადამიანებს აღარ მოუნდეთ, აღარც პროტესტის გამოხატვა და მათ საერთოდ უარი თქვან საკუთარი უფლებების დაცვაზე“, - განაცხადა ქურდოვანიძემ.

ცნობისთვის, „ქართული ოცნება“ საკანონმდებლო ცვლილებებს გეგმავს, რათა „ხელისუფლებას ქვეყნის ეფექტურად მართვისთვის შესატყვისი ბერკეტები“ ჰქონდეს. კონკრეტულად რა ცვლილებები იგეგმება, ამის შესახებ საპარლამენტო უმრავლესობის ლიდერმა მამუკა მდინარაძემ საპარლამენტო უმრავლესობის სხდომის შემდეგ პრესკონფერენციაზე ისაუბრა და განმარტა, რომ მკაცრდება მთელი რიგი რეგულაციები როგორც ადმინისტრაციულ სამართალდარღვევათა, ისე სისხლის სამართლის კოდექსში. მისი თქმით, მესაკუთრის წინასწარი თანხმობის გარეშე იკრძალება დახურულ სივრცეში, შენობებში, აქციების ჩატარება; წვრილმანი ხულიგნობისთვის, ვანდალიზმისთვის, სამართალდამცავი ორგანოს წარმომადგენლის მოთხოვნის დაუმორჩილებლობის და მათი შეურაცხყოფისთვის, სასამართლოს შესასვლელების ბლოკირებისთვის და სხვა მსგავსი ადმინისტრაციული კანონდარღვევისთვის ჯარიმები იზრდება და ასევე, იზრდება ადმინისტრაციული პატიმრობის ვადა 60 დღემდე; ადმინისტრაციულ სამართალდარღვევად განისაზღვრება სახელმწიფო პოლიტიკური პირის, საჯარო მოსამსახურის სიტყვიერი შეურაცხყოფა მის საქმიანობასთან დაკავშირებით. რაც შეეხება სისხლის სამართლის კოდექსში დაგეგმილ ცვლილებებს, მდინარაძის თქმით, ძალადობრივი ქმედებებისკენ საჯაროდ მოწოდება განისაზღვრება პატიმრობა 3 წლამდე ვადით; იზრდება სისხლის სამართლებრივი პატიმრობის ვადა პოლიციელების მიმართ წინააღმდეგობის, მუქარის და ძალადობისთვის და იქნება 5 წლიდან 6 წლამდე; ასევე, მკაცრდება სანქცია პოლიციელზე, ხელისუფლების წარმომადგენლებზე და მათი ოჯახის წევრებზე თავდასხმისთვის, ჯგუფურობის, არაერთგზისობის, საშიში საშუალებით განხორციელების შემთხვევაში; სასჯელი იზრდება პოლიციელის ჯანმრთელობის ხელყოფის ფაქტზეც; სისხლის სამართლის წესით დაისჯება პოლიტიკური თანამდებობის პირზე სახელმწიფო მოსამსახურეზე, საჯარო მოსამსახურეზე თავდასხმის ან ძალადობის მუქარის ჩამდენი პირიც.

ავტორი: ექსპრესნიუსი,

სოციალური ქსელები

ირანის საგარეო საქმეთა მინისტრმა ევროპა გააფრთხილა აშშ-სა და ისრაელის მხარდაჭერის შედეგების შესახებ

ზელენსკიმ გაეროს გენერალური ასამბლეის ტრიბუნიდან რუსეთს ენერგეტიკულ სექტორზე საპასუხო დარტყმებით დაემუქრა

რუსი ჟურნალისტი და ბლოგერი იური დუდი ტერორისტებისა და ექსტრემისტების სიაში დაამატეს

RBC-Ukraine: აზერბაიჯანმა და თურქეთმა მხარი დაუჭირეს ევროკავშირის სანქციების მოხსნას რუსი მილიარდერის, უსმანოვის წინააღმდეგ