2024-12-13 20:33:39, 505 ნახვა

---

სალომე ზურაბიშვილი - პროვოკაციაა, ხვალ რაც ხდება პარლამენტში - პროვოკაცია თუ პაროდია - არ ვიცი, როგორ დავარქვა

პროვოკაციაა, ხვალ რაც ხდება პარლამენტში - პროვოკაცია თუ პაროდია - არ ვიცი, როგორ დავარქვა. ალბათ, უფრო პაროდია, რადგან ეს იქნება ის ღონისძიება, რომელიც მთლიანად მოკლებულია ლეგიტიმაციას, არაკონსტიტუციურია, არალეგიტიმურია,- ასე ეხმაურება საქართველოს პრეზიდენტი სალომე ზურაბიშვილი პარლამენტში დაგეგმილ პრეზიდენტის არჩევნებს.

როგორც ზურაბიშვილმა ცოტა ხნის წინ გამართულ ბრიფინგზე განაცხადა, მმართველმა პარტიამ ქვეყანა პაროდიად გადააქცია.

„ყველაფერი პაროდიაა, თუნდაც დღეს რაც ხდება, რომ „ოცნებიდან“ გადის „ხალხის ძალა“, მერე დაბრუნდება, იქედან ნიშნავენ პრეზიდენტს. ამ ყველაფერს პოლიტიკურ პროცესთან კავშირი არა აქვს. ეს არის ყველაზე სამწუხარო, რადგან გაგვიხადეს სახელმწიფო პაროდიად. ეს ყველასთვის ძალიან შეურაცხმყოფელია.

ეს არის ერთგვარი პროვოცირება ხალხის რეაქციების იმიტომ, რომ ეს არის ყველაფრის შეურაცხყოფა - ჩვენი წარსულის, ტრადიციების, კულტურის, რომ დამოუკიდებელი ქვეყნის ინსტიტუტებს ასე მოეპყრო, თუნდაც პარლამენტს პირველ რიგში და სხვა ინსტიტუტებს. და ეს არის, ალბათ, მიუღებელი.

მაგრამ ჩვენ ამაზე არ შევჩერდეთ და ეს არის ჩემი დღევანდელი მოწოდება. ამ ყველაფერს მნიშვნელობა არა აქვს - პაროდია მათ დარჩებათ. მთავარი ხდება სხვაგან - მთავარი ხდება დღეს ჩვენს ქუჩებსა და ქალაქებში. მთავარი ხდება ის, რომ გამოდის კიდევ უფრო მეტი და მეტი ადამიანი, რომელიც თავის საკუთარ პროტესტს ახორციელებს ამ გამოსვლებით, ამ პეტიციებით, სიტყვით, მარშით - ამან მოიცვა უკვე მთელი ქვეყანა“,- განაცხადა სალომე ზურაბიშვილმა.

შეგახსენებთ, ხვალ, 14 დეკემბერს საარჩევნო კოლეგიამ საქართველოს მეექვსე პრეზიდენტი უნდა აირჩიოს. პრეზიდენტის თანამდებობაზე ასარჩევად „ქართულმა ოცნებამ“ მიხეილ ყაველაშვილის კანდიდატურა წარადგინა.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი