2024-12-13 10:20:09, 370 ნახვა

---

წილოსანი - რადიკალები წინასაარჩევნოდ რესურსს ზოგავდნენ, რომ აქციებზე ვითომ გულანთებული პროფესიული ჯგუფების გამოსვლები დაეორგანიზებინათ

„ქართული ოცნების“ წარმომადგენელი ნინო წილოსანი ქვეყნის მასშტაბით მიმდინარე საპროტესტო აქციებს ეხმაურება.

როგორც წილოსანი სოციალურ ქსელში წერს, „რადიკალები წინასაარჩევნოდ ელექტორალურ რესურსს ზოგავდნენ, რომ აქციებზე სხვადასხვა პროფესიული ჯგუფის საპროტესტო გამოსვლები დაეორგანიზებინათ“.

„როგორც ხედავთ, რადიკალები წინასაარჩევნოდ მთელს მათ ელექტორალურ რესურსს ზოგავდნენ, რომ სწორედ ახლა, მიმდინარე აქციებზე, სხვადასხვა ვითომ გულანთებული პროფესიული ჯგუფების საპროტესტო გამოსვლები დაეორგანიზებინათ.

მოკლედ, დამარცხებულ ოპოზიციას პოსტსაარჩევნო შეხვედრები აქვს და ამომრჩევლის მოლოდინში არიან“,- წერს წილოსანი „ფეისბუქზე“.

შეგახსენებთ, თბილისი და საქართველოს სხვა დიდი ქალაქები, მათ შორის, ბათუმი, ზუგდიდი, ქუთაისი, საპროტესტო ტალღამ მას შემდეგ მოიცვა, რაც ქვეყნის პრემიერ-მინისტრმა, ირაკლი კობახიძემ გაახმოვანა მმართველი პარტიის გადაწყვეტილება, რომ ევროკავშირთან მოლაპარაკებების გახსნის საკითხი 2028 წლის ბოლომდე დღის წესრიგში არ დადგება.

28 ნოემბრიდან დღემდე, მთავრობის გადაწყვეტილება არაერთმა პროფესიულმა ჯგუფმა, მათ შორის განათლების, ხელოვნების, IT და ტექნოლოგიური სფეროს წარმომადგენლებმა გააპროტესტეს.

აქციების დაწყებიდან დღემდე, პოლიციამ ასობით ადამიანი დააკავა, მათ შორის როგორც სისხლის სამართლის, ისე ადმინისტრაციულ სამართალდარღვევათა კოდექსის საფუძველზე.

შინაგან საქმეთა სამინისტროს მიერ გავრცელებული ინფორმაციის მიხედვით, რუსთაველის გამზირზე, აქციების მიმდინარეობისას ჯგუფური ძალადობის ორგანიზების, ხელმძღვანელობის ან მასში მონაწილეობის, ძალადობრივი ქმედებისაკენ საჯაროდ მოწოდების, ასევე, აფეთქების მომზადების, პოლიციაზე თავდასხმისა და ნივთის დაზიანების ფაქტებზე, გამოძიება სისხლის სამართლის კოდექსის 225-ე, 239-ე პრიმა, 187-ე, 353-ე პრიმა და 18-229-ე პრიმა მუხლებით მიმდინარეობს.

შსს-ს თანამშრომლების მიერ გამოძიების ფარგლებში ამ დროისთვის დაკავებულია 30-ზე მეტი პირი.

დაშავებულია ათობით ადამიანი, რომლებიც დაკავების შემდგომ სპეცრაზმელებისგან ფიზიკურ ანგარიშსწორებაზე უთითებენ. დაშავებულთა შორის არიან მედიის წარმომადგენლები. ერთ-ერთი ბოლო თავდასხმა მედიაზე 7 დეკემბერს მოხდა, როდესაც „TV პირველის“ ჟურნალისტ მაკა ჩიხლაძესა და ოპერატორ გიორგი შეწირულს თბილისში, ბესიკის ქუჩის მიმდებარედ ფიზიკურად გაუსწორდნენ. 

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი