გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი გერმანიის ფედერაციული რესპუბლიკის ქ. ბონში გამართულ გაეროს გარემოსდაცვითი პროგრამის (UNEP) ქიმიური ნივთიერებების მართვის მეხუთე საერთაშორისო კონფერენციაში (ICCM5) მონაწილეობდა. ამის შესახებ ინფორმაციას სოფლის მეურნეობის სამინისტრო ავრცელებს.

უწყების ცნობით, კონფერენცია, რომელიც გერმანიის ფედერალურმა კანცლერმა ოლაფ შოლცმა გახსნა, „ქიმიური ნივთიერებების საერთაშორისო მართვის შესახებ სტრატეგიული მიდგომის” (SAICM) ფარგლებში გაიმართა.

"დელეგატებს მისასალმებელი სიტყვით მიმართეს გერმანიის გარემოს, ბუნების დაცვის, ბირთვული უსაფრთხოების და მომხმარებელთა დაცვის ფედერალურმა მინისტრმა, შტეფი ლემკემ და გაეროს გენერალური მდივნის მოადგილემ, გაეროს გარემოსდაცვითი პროგრამის (UNEP) აღმასრულებელმა დირექტორმა, ინგერ ანდერსენმა.

კონფერენციაზე სიტყვით გამოსვლისას, გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა ხაზი გაუსვა ქიმიური ნივთიერების და ნარჩენების გლობალურ დონეზე უსაფრთხო მართვის მნიშვნელოვნებას, ასევე, ამ მიმართულებით საქართველოს მიერ გადადგმულ ნაბიჯებს და გამოწვევებს.

კონფერენციის მთავარი ამოცანა იყო მაღალი დონის დეკლარაციის და „2020 წლის მიღმა“ ქიმიური  ნივთიერებებისა და ნარჩენების გლობალური პოლიტიკის ჩარჩო ინსტრუმენტის მიღება, რომელიც მიზნად ისახავს ქიმიური ნივთიერებებით გარემოს დაბინძურებასთან დაკავშირებით მსოფლიოში არსებული გამოწვევების გადაჭრას.

სოლომონ პავლიაშვილმა კონფერენციის ფარგლებში გამართულ მაღალი დონის მრგვალი მაგიდის ფორმატის დისკუსიებშიც მიიღო მონაწილეობა. მინისტრის მოადგილემ საქართველოს მიერ ქიმიური ნივთიერების და ნარჩენების მართვის მიმართულებით ევროკავშირის შესაბამის რეგულაციებთან კანონმდებლობის ჰარმონიზების კუხით გადადგმულ ნაბიჯებზე და სამომავლოდ დაგეგმილ ღონისძიებებზე ისაუბრა. აღინიშნა, რომ საქართველო მონაწილეობს „ქიმიური ნივთიერებების საერთაშორისო მართვის შესახებ სტრატეგიული მიდგომის” (SAICM) განხორციელებაში.

მრგვალი მაგიდის ფორმატში გამართულ შეხვედრაზე, „ვერცხლისწყლის შესახებ“ მინამატას  კონვენციის აღმასრულებელმა მდივანმა მონიკა სტანკევიჩმა სოლომონ პავლიაშვილს და ქართული დელეგაციის წევრებს მადლობა გადაუხადა საქართველოს მიერ მინამატას კონვენციის რატიფიკაციისთვის.

კონფერენციის მაღალი დონის სეგმენტის საბოლოო პლენარულ სესიაზე შეჯამდა მრგვალი მაგიდის ფორმატის დისკუსიები და წარმოდგენილი იქნა ანგარიში, რომელშიც აღინიშნა „ქიმიური ნივთიერებების საერთაშორისო მართვის შესახებ სტრატეგიული მიდგომის” (SAICM) განხორციელებაში საქართველოს მიერ გადადგმული ნაბიჯები",- ნათქვამია უწყების ინფორმაციაში.

ავტორი: NS (სტატია დაფინანსებულია),

სოციალური ქსელები

ბათუმში სატვირთო ავტომობილი ქვეითს დაეჯახა

ტრამპი: გავაუქმე დღეს საღამოს ირანის წინააღმდეგ დაგეგმილი ავიადარტყმები და დაბომბვები

გიორგი ტაბატაძე: გვქონდა შეხვედრა EU-ში, მოვისმინეთ მათი პოზიციები, მათ ჩვენი

შსს: რუსთავში ჩხუბისას კაცი წაიქცა, დაზიანება მიიღო, გარდაიცვალა - დაკავებულია 5 პირი