საქართველოს გარემოს დაცვისა და სოფლის მეურნეობის მინისტრი ოთარ შამუგია, ამერიკის შეერთებულ შტატებში სამუშაო ვიზიტის ფარგლებში,  აშშ-ის საერთაშორისო განვითარების სააგენტოს (USAID) ადმინისტრატორის მოადგილეს ევროპისა და ევრაზიის ბიუროში, ერინ ელიზაბეტ მაკკიისს შეხვდა. აღნიშნულის შესახებ ინფორმაციას გარემოს დაცვისა და სოფლის მეურნეობის სამინისტრო ავცელებს.

როგორც ოთარ შამუგიამ შეხრვედრაზე აღნიშნა, აშშ-ის, როგორც საქართველოს სტრატეგიული პარტნიორის მხარდაჭერა ძალიან მნიშვნელოვანია სოფლის მეურნეობის, სოფლის განვითარების და გარემოს დაცვის მიმართულებით განხორციელებულ ღონისძიებებში. USAID-თან მრავალწლიანი წარმატებული თანამშრომლობის გამოცდილება არსებობს არაერთი მნიშვნელოვანი მიმართულებით, როგორებიც არის: წყლის რესურსების მართვა, დაცული ტერიტორიების განვითარება, სურსათის უვნებლობისა და ფიტოსანიტარიის მიმართულებებით გაწეული მხარდაჭერა, თხილის სექტორის ხელშეწყობა და სხვა არაერთი პროექტი, რაც გასულ წლებში განხორციელდა და  ამ ეტაპზეც გრძელდება.

„მოხარული ვარ, რომ აშშ-ში ჩემი წინა ვიზიტის ფარგლებში განხილული საკითხები, რაც უკავშირდებოდა ღვინის პოპულარიზაციასა და ცნობადობის ამაღლებაში ხელშეწყობას, უკვე აისახა USAID-ის პროექტებში. ჩვენ აქტიურად ვთანამშრომლობთ პროექტის განმახორციელებელ გუნდთან და ველოდებით ხელშესახებ პროგრესს. ასევე აქტიურად ვთანამშრომლობთ საქართველოში USAID-ის ადგილობრივ გუნდთან, რომელსაც ბატონი ჯონ პენელი ხელმძღვანელობს და, ვფიქრობთ, გვექნება კიდევ უფრო მეტი თვალსაჩინო წარმატების მაგალითი როგორც დარგის კონკურენტუნარიანობის ამაღლების, ასევე პროდუქციის ექსპორტის ზრდის კუთხით, განსაკუთრებით, აშშ-ის და სხვა სტრატეგიული პარტნიორი ქვეყნების ბაზრებზე“, - განაცხადა ოთარ შამუგიამ.

როგორც ერინ ელიზაბეტ მაკკიისმა აღნიშნა, აშშ-ის საქართველოსთან 30 წლიანი თანამშრომლობა განსაკუთრებით ნაყოფიერია სოფლის მეურნეობისა და გარემოს დაცვის მიმართულებით.

„ჩვენ გავაგრძელებთ მხარდაჭერასა და პარტნიორობას თქვენთან, რადგან ძლიერი თქვენ, ნიშნავს ძლიერ ჩვენს. ჩვენ ხელს შევუწყობთ საქართველოს ეკონომიკურ ძლიერებას და ევროატლანტიკურ სტრუქტურებში ინტეგრაციას”, - განაცხადა ერინ ელიზაბეტ მაკკიისმა.

შეხვედრაზე ყურადღება გამახვილდა ბიოწარმოების ხელშეწყობის პროგრამებზე, ფერმერების მხარდაჭერაზე თანამედროვე ტექნოლოგიების დანერგვის, ბუნებრივი რესურსების რაციონალურ გამოყენებისა და მართვის მიმართულებებით; ასევე, ეკოტურიზმში ინვესტიციების განხორციელების მნიშვნელობაზე.

აღსანიშნავია, რომ აშშ-ის საერთაშორისო განვითარების სააგენტოს (USAID) მხარდაჭერით, ახალი მასშტაბური პროგრამის -  „ძლიერი სოფლის პროგრამა“ (2022-2027) ფარგლებში, 23.7 მილიონ აშშ დოლარზე მეტი მოხმარდება საოკუპაციო ხაზის მიმდებარე სოფლების მოსახლეობის სოციალურ-ეკონომიკური მდგომარეობის გაუმჯობესებას.

საქართველოს გარემოს დაცვისა და სოფლის მეურნეობის მინისტრი ვაშინგტონში  ამერიკის შეერთებულ შტატების სოფლის მეურნეობის  მდივნის ოფიციალური მოწვევით იმყოფება. 

ერინ ელიზაბეტ მაკკიისთან გამართულ შეხვედრას, მინისტრ ოთარ შამუგიასთან ერთად, საქართველოს საგანგებო და სრულუფლებიანი ელჩი ამერიკის შეერთებულ შტატებში დავით ზალკალიანი და გარემოს დაცვისა და სოფლის მეურნეობის მინისტრის პირველი მოადგილე ნინო თანდილაშვილი ესწრებოდნენ.

ავტორი: NS (სტატია დაფინანსებულია),

სოციალური ქსელები

აშშ-ის ფინანსთა მინისტრი: თურქეთმა, ომანმა და არაბთა გაერთიანებულმა საემიროებმა ირანული ავიახაზებისა და ბანკების ფუნქციონირება შეზღუდეს

ყაზახეთის პრეზიდენტმა თავდაცვის მინისტრი თანამდებობიდან გაათავისუფლა მას შემდეგ, რაც სამხედრო წვრთნების დროს 14 ჯარისკაცი დაიღუპა

კახა კალაძე: მჯერა, ჩვენი გმირების ბრძოლას უკვალოდ არ ჩაუვლია, ოკუპაცია დროებითია, სამშობლო კი მარადიული

გვარამია - პატივი მივაგოთ ჩვენს გმირებს და ხმამაღლა ვუთხრათ სამყაროს: სოხუმი საქართველოა! საქართველო ჩვენია! რუსეთი მტერია!