საპარლამენტო ოპოზიციის ნაწილი შინაგან საქმეთა მინისტრს, ვახტანგ გომელაურს პარლამენტში იბარებს. ამის შესახებ ოპოზიციონერმა დეპუტატმა, ხატია დეკანოიძემ განაცხადა.

როგორც დეკანოიძემ ცოტა ხნის წინ გამართულ საგანგებო ბრიფინგზე აღნიშნა, ვახტანგ გომელაურის საკანონმდებლო ორგანოში დაბარება 7-8 მარტის მოვლენებს უკავშირდება.

"მმართველ ძალასა და ხელისუფლებას არ ეგონოს, რომ ჩვენ დაგვავიწყდა 7-8 მარტის მოვლენები, როდესაც ქართველმა ხალხმა ხელისუფლებას ძალიან კონკრეტულად უთხრა - არა რუსულ კანონს... 7-8 მარტს, შსს-ს მიერ არაპროპორციული ძალის გამოყენების შედეგად, დაშავდნენ ადამიანები; დააკავეს ძალიან ბევრი მოქალაქე; ფიზიკური დაზიანებები აღენიშნებოდათ პოლიტიკოსებს; გამოიყენეს სპეციალური საშუალებები. არც ერთი პოლიციელის დასჯაზე არ გვაქვს ინფორმაცია, არც ერთი სამართალდამცავი უწყების მიერ გაკეთებული განცხადება არ გვინახავს, რომ რომელიმე პოლიციელი ძალადობის გამო დაისაჯა. ჩვენ გვჭირდება პასუხები კითხვებზე. ჩვენ ვიბარებთ ინტერპელაციის წესით შინაგან საქმეთა მინისტრს. საქართველოს პარლამენტის რეგლამენტის 149-ე მუხლის პირველი პუნქტით მონიჭებული უფლებამოსილება განმარტავს იმას, რომ შინაგან საქმეთა მინისტრი უნდა მოვიდეს პარლამენტში და უნდა გასცეს მნიშვნელოვან, კონკრეტულ კითხვებს პასუხი", - განაცხადა ხატია დეკანოიძემ.

შეგახსენებთ, 10 მარტს, საქართველოს პარლამენტმა „უცხოური აგენტების შესახებ“ კანონპროექტი მეორე მოსმენით ჩააგდო. საკანონმდებლო ორგანოში „უცხოური აგენტების შესახებ“ კანონპროექტი პირველი მოსმენით 7 მარტს მიიღეს, 8 მარტს კი, პარლამენტის თავმჯდომარემ ის ვენეციის კომისიაში გადააგზავნა. მანამდე, კანონპროექტს მხარი 2 მარტს, საგარეო ურთიერთობათა და თავდაცვისა და უშიშროების კომიტეტების გაერთიანებულ სხდომაზე, 6 მარტს კი, იურიდიულ კომიტეტზე დაუჭირეს. 

აღსანიშნავია, რომ "უცხოური აგენტების შესახებ" ანტიდასავლური მოძრაობა "ხალხის ძალის" კანონპროექტი ვენეციის კომისიიდან პარლამენტის თავმჯდომარემ, შალვა პაპუაშვილმა 9 მარტს გამოიწვია. გამოწვევის გადაწყვეტილება „ქართული ოცნების“ პოლიტიკურმა საბჭომ, „ხალხის ძალამ“ და საპარლამენტო უმრავლესობამ მას შემდეგ მიიღო, რაც პარლამენტის შენობასთან არაერთი საპროტესტო აქცია გაიმართა.

7-8 მარტს, შინაგან საქმეთა სამინისტრომ თბილისში, პარლამენტთან მიმდინარე საპროტესტო აქციებზე ცრემლსადენი გაზი და წყლის ჭავლი გამოიყენა. სამართალდამცავებმა პროტესტის მოწინააღმდეგე 100-ზე მეტი პირი დააკავეს. 

ავტორი: ექსპრესნიუსი,

სოციალური ქსელები

ლუკას სიპერი - საქართველოს მთავრობა თავის მოსახლეობას აშორებს ევროპისკენ მიმავალი გზისგან, მაგრამ ეს მხოლოდ დროის ამბავია

დევიდ მაკალისტერი- ყველა ძირითადი ოპოზიციური პარტიის აკრძალვისკენ სწრაფვით, რეჟიმმა ავტორიტარული მმართველობისკენ კიდევ ერთი გულგრილი ნაბიჯი გადადგა

ევროკომისარი როსვოლი - ევროკავშირი ქართულ ოცნებას მოუწოდებს, შეცვალოს თავისი საზიანო ქმედებები და ანტიდემოკრატიული კანონმდებლობა, გაათავისუფლოს თვითნებურად დაკავებული ოპოზიციის წევრები

მალგორჟატა გოშევსკა - ივანიშვილი საქართველოში დემოკრატიას ანადგურებს და ქვეყანას რუსული ტიპის დიქტატურისკენ მიაქანებს