ძალიან მიხარია, რომ საარჩევნო რეფორმების კუთხით ფართო კონსენსუსი არსებობს, - ამის შესახებ საქართველოში ევროკავშირის ელჩმა, კარლ ჰარცელმა ჟურნალისტებს განუცხადა.

როგორც მან აღნიშნა, საარჩევნო რეფორმის პარალელურად, 19 აპრილის შეთანხმების ერთ-ერთი საკვანძო ნაწილი მართლმსაჯულების რეფორმაა.

„ძალიან მიხარია, რომ საარჩევნო რეფორმების კუთხით ფართო კონსენსუსი არსებობს და ახლა ეს პროექტი ჯერ ვენეციის კომისიას უნდა გაეგზავნოს შემდეგ კი განხილვა იქნება პარლამენტში. 19 აპრილის შეთანხმების კიდევ ერთი საკვანძო პუნქტი მართლმსაჯულების რეფორმაა. ვფიქრობ, მოკლე პერსპექტივაში აუცილებლად უნდა ვადევნოთ თვალი უზენაესი სასამართლოს მოსამართლეების დანიშვნის პროცედურას. ასევე იქნება დანიშვნები იუსტიციის უმაღლეს საბჭოში. ეს ორი უწყება ძალიან მნიშვნელოვანია იმისთვის, რომ საზოგადოებაში მართლმსაჯულების მიმართ ნდობა აღდგეს და ამ რეფორმამ აზრი შეიძინოს. ამის პარალალურად იქნება ასევე სხვა რეფორმების განხილვაც, რომელშიც ევროკავშირი და სხვა ევროპელი პარტნიორები ასევე მიიღებენ მონაწილეობას“, - განაცხადა ჰარცელმა.

მისივე თქმით, თამარ ჟვანიას თანამდებობაზე დისკუსიები 19 აპრილის შეთანხმების ნაწილი არ არის.

„რაც შეეხება გუშინდელ შეთანხმებას, ყველა დეტალი არ ვიცი, მაგრამ ვფიქრობ, ფუნდამენტურად მნიშვნელოვანია, რომ როგორც ჩანს, პაკეტის ირგვლივ მხარეებს შორის ფართო კონსენსუსია მიღწეული. ვიმედოვნებ, ეს არის 19 აპრილის შეთანხმების სულისკვეთებით. ახლა გაგზავნილია ვენეციის კომისიაში, რათა კანონპროექტი შემოწმდეს და გაიცეს რეკომენდაციები პროცესის დასრულებისთვის. შემიძლია ვთქვა, რომ პროცესი გამოიყურება იმედისმომცემად. იყო დისკუსიები ცენტრალური საარჩევნო კომისიის ხელმძღვანელ პოზიციებთან დაკავშირებით, მაგრამ თამარ ჟვანიას თანამდებობაზე დისკუსიები არ არის 19 აპრილის შეთანხმების ნაწილი. დისკუსიების გაგრძელება დამოკიდებულია პარტიებზე“, - განაცხადა კარლ ჰარცელმა.

ავტორი: ექსპრესნიუსი,

სოციალური ქსელები

კობახიძე მედიას ცენზურას აქტიურად აგრძელებს და მედიასაშუალებებს სამართლებრივი დევნით ემუქრება

ქართული ოცნება – ივანიშვილმა შეაჯამა წარსულში გუნდში არსებული კორუფციული გამოწვევები და აღნიშნა, რომ პრემიერის, გუნდისა და ძალოვანი სისტემის ეფექტური მუშაობა

მოსკოვში დრონების თავდასხმების შედეგად 350-ზე მეტი რეისი გაუქმდა და გადაიდო

საბერძნეთი განიხილავს ლიეტუვაში კრემლის ორი კრიტიკოსის მკვლელობის დაგეგმვაში ეჭვმიტანილი საქართველოს მოქალაქის ექსტრადირებას