ინვალიდ-ამპუტანტ ფეხბურთელთა შორის მესამე ჩემპიონატი გაიმართა.

თავდაცვის სამინისტროს ინფორმაციით, ჩემპიონატი საქართველოს ინვალიდ-ამპუტანტ ფეხბურთელთა ლიგის ორგანიზებითა და ფეხბურთის ფედერაციის მხარდაჭერით მოეწყო.

სპორტულ შეჯიბრში საქართველოს შეიარაღებული ძალების წარმომადგენელი, ბათუმის გუნდის წევრი სერჟანტი სოსო გოგიტიძე ჩაერთო. გამარჯვებულები დღეს გლდანში მდებარე სპორტულ კომპლექსში დააჯილდოვეს. საქართველოს თავდაცვის სამინისტროს დაჭრილ და დაშავებულ სამხედრო მოსამსახურეთა მხარდაჭერის დეპარტამენტის უფროსმა, პაატა პატიაშვილმა პირველ ადგილზე გასული თბილისის გუნდის 11 და 12 წლის მონაწილეებს, მათე ქარდავასა და ლაშა ბრეგაძეს სიმბოლური საჩუქრები გადასცა. ფეხბურთის ჩემპიონატში მეორე ადგილი გორის, ხოლო, მესამე ადგილი ზუგდიდის გუნდს ერგო. ორგანიზატორებმა პარასპორტსმენებს შესაბამისი თასები, მედლები და სიმბოლური საჩუქრები გადასცეს.

„თავდაცვის სამინისტროსთვის მნიშვნელოვანია სპორტულ ღონისძიებებში მონაწილეობა, რადგან ეს ხელს უწყობს საზოგადოებაში ცხოვრების აქტიური წესის დამკვიდრებას. მომავალ წელს აქტიურ მონაწილეობას მივიღებთ ტურნირის ორგანიზებაში. ამ ეტაპზე ბათუმის გუნდში სერჟანტი სოსო გოგიტიძე მონაწილეობს. თავდაცვის სამინისტრო მაქსიმალურად ხელს შეუწყობს სამხედროებს, რომ მსგავს ღონისძიებებში ჩაერთონ“, - აღნიშნა პაატა პატიაშვილმა.

ინვალიდ-ამპუტანტ ფეხბურთელთა ლიგამ ჩემპიონატი მესამედ ჩაატარა.

ჩემპიონატში წელს ბათუმის, ზუგდიდის, ქუთაისის, ზესტაფონის, გორისა და თბილისის გუნდები მონაწილეობდნენ. იგეგმება საქართველოს თასის და სუპერთასის გათამაშებაც. სპორტული აქტივობის მიზანი დაშავებული მოქალაქეების საზოგადოებაში ადაპტაცია და ინტეგრაციაა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ევროპარლამენტის ანგარიშში ირაკლი ღარიბაშვილის გვარიც მოხვდა - რა წერია მასზე

თიბისი ტექსკლა - მოსწავლეებისთვის ხელოვნური ინტელექტის შესწავლის ახალი შესაძლებლობები

რუსთავი 2: ევროპული სახელმწიფოს სასარგებლოდ ჯაშუშობისთვის გიორგი უძილაური დააკავეს

პაპუაშვილი: პრეზიდენტ ზელენსკის მოუწია ირაკლი კობახიძესთან მისვლა და საუბარი