თალაკვაძე IRI-ის კვლევაზე - არსებობს სხვა ავტორიტეტული კვლევა, სადაც „ქართულ ოცნებას“ 56% და მეტი მხარდაჭერა აქვს

2020-09-17 12:11:26, 599 ნახვა

კომენტარი

პარლამენტის თავმჯდომარემ არჩილ თალაკვაძემ IRI-ის კვლევასთან დაკავშირებით განაცხადა, რომ არსებობს სხვა ავტორიტეტული კვლევა, სადაც „ქართულ ოცნებას“ 56% და მეტი მხარდაჭერა აქვს.

თალაკვაძის თქმით, უკვე არსებული მხარდაჭერა საკმარისია იმისთვის, რომ „ქართულმა ოცნებამ“ მიიღოს საპარლამენტო უმრავლესობა და დამოუკიდებლად ჩამოაყალიბოს მთავრობა.

„არსებობს არაერთი ავტორიტეტული კვლევა, სადაც ჩანს, რომ „ქართულ ოცნებას“ აქვს 56 და კიდევ უფრო მაღალი ნდობა მოსახლეობის მხრიდან და ეს ყველაფერი საარჩევნო კამპანიის შუაში. კამპანიის დასრულების შემდეგ ველით, რომ ეს მხარდაჭერა უფრო გაიზრდება. უკვე არსებული მხარდაჭერა არის საკმარისი იმისთვის, რომ ქართულმა ოცნებამ“ მიიღოს საპარლამენტო უმრავლესობა და დამოუკიდებლად ჩამოაყალიბოს მთავრობა.

IRI-ის კვლევას რაც შეეხება, არაერთხელ განვმარტეთ ჩვენ, რომ ეს არის შედეგები, რომელიც დამუშავებულია ალოკაციის გარეშე,რაც არ ასახავს სრულფასოვან სურათს, თუ რა მხარდაჭერაა იმ ჯგუფებში, ვინც თავი შეიკავა პასუხის გაცემისგან“, - განაცხადა თალაკვაძემ.

ცნობისთვის, საერთაშორისო რესპუბლიკური ინსტიტუტის (IRI) კვლევის შედეგების მიხედვით, კითხვაზე, ამ კვირას რომ არჩევნები ტარდებოდეს, საზოგადოების 36% ხმას „ქართულ ოცნებას“, 15% „ნაციონალურ მოძრაობას“, 4% კი, „ევროპული საქართველოს", დაუჭერს მხარს.

Patreon P მხარი დაუჭირე "ექსპრესნიუსს" →

ავტორი: ცოტნე ტალახაძე, ექსპრესნიუსის რეპორტიორი 2019 წლიდან