ევროსაბჭოს საპარლამენტო ასამბლეამ მხარი დაუჭირა საქართველოს დელეგაციის მიერ ინიცირებულ ცვლილებებს, რომელთა თანახმად, ასამბლეა რუსეთს საოკუპაციო ხაზის გასწვრივ მავთულხლართების დამონტაჟებისა და ხელოვნური ბარიერების აღმართვის დაუყოვნებლივი შეწყვეტისკენ მოუწოდებს და საქართველოს ტერიტორიული მთლიანობისა და სუვერენიტეტის მიმართ მტკიცე მხარდაჭერას ერთხელ ადასტურებს.

რეზოლუციის თანახმად, ასამბლეა შეშფოთებას გამოთქვამს ცხინვალის რეგიონში რუსეთის იმ უკანონო ქმედებებთან დაკავშირებით, რომელთა მიზანია სოფელ ატოცთან საოკუპაციო ხაზზე ხელოვნური ბარიერების აღმართვა. „დაუყოვნებლივ შეწყდეს მავთულხლართებისა და ხელოვნური ბარიერების აღმართვა აფხაზეთისა და ცხინვალის რეგიონების საოკუპაციო ხაზის გასწვრივ და მოხდეს საერთაშორისო სამართლის ნორმებისა და პრინციპების დაცვა. ამასთან დაკავშირებით, ასამბლეა კვლავ ადასტურებს მის მტკიცე მხარდაჭერას საქართველოს სუვერენიტეტისა და ტერიტორიული მთლიანობის მიმართ, მის საერთაშორისოდ აღიარებულ საზღვრებში",-ნათქვამია დოკუმენტში.

საქართველოს საპარლამენტო დელეგაციის მიერ მომზადებული ცვლილებები ერთხმად მიიღო ევროსაბჭოს საპარლამენტო ასამბლეამ.

„ასამბლეამ ერთხმად დაუჭირა მხარი  საქართველოს დელეგაციის მიერ ინიცირებულ ცვლილებას, რომელიც ჩვენი ქვეყნისთვის ძალიან მძიმე პროცესს - მიმდინარე ოკუპაციას და ხელოვნური  ბარიერების აღმართვას ეხება.  გასულ წელს, სოფელ ატოცში, ამასთან დაკავშირებით მოხდა სამწუხარო ფაქტი და ევროსაბჭოს საპარლამენტო ასამბლეა სწორედ ამას გამოეხმაურა. ასამბლეამ მოუწოდა რუსეთს,  დაუყოვნებლივ შეწყვიტოს მსგავსი ქმედებები და სრულიად ფუნდამენტური უფლებების დარღვევა, როგორც ევროსაბჭოს წევრმა სახელმწიფომ",- განაცხადა თამარ ჩუგოშვილმა.

საქართველოს პარლამენტის თავმჯდომარის პირველი მოადგილის თქმით, აღნიშნული რეზოლუციის მიღებით, ევროსაბჭომ კიდევ ერთხელ დააფიქსირა საკუთარი დამოკიდებულება ჩვენი ქვეყნის ტერიტორიული მთლიანობის საკითხის მიმართ.

„ეს განცხადება მნიშვნელოვანია, რადგან ამ რეზოლუციით ევროსაბჭოს საპარლამენტო ასამბლეა და მთლიანად, ევროსაბჭო, კიდევ ერთხელ აფიქსირებს საკუთარ დამოკიდებულებას საქართველოს ოკუპაციის პრობლემის მიმართ, ასევე, კიდევ ერთხელ აფიქსირებს დამოკიდებულებას ჩვენი ქვეყნის ტერიტორიული მთლიანობის მიმართ. მთავარია, რომ ყველა რეზოლუცია და დოკუმენტი, რომელიც საქართველოსთან დაკავშირებით იქნება და ჩვენს მიმართ არსებული ცალსახა პოლიტიკური მხარდაჭერა, მომავალში ქმედებებში გადაითარგმნოს",- განაცხადა ევროსაბჭოს საპარლამენტო ასამბლეაში ქართული დელეგაციის ხელმძღვანელმა.

ავტორი: ,

სოციალური ქსელები

ISW: რუსეთის არმიის რეალური წარმატებები უკრაინაში პუტინის მიერ განცხადებულზე ხუთჯერ ნაკლები აღმოჩნდა

საქართველოში რუსულენოვანთა რაოდენობა თითქმის 19%-ით გაიზარდა

ეუთოს საპარლამენტო ასამბლეის კომიტეტმა მხარი დაუჭირა საქართველოში არსებული ვითარების შესახებ რეზოლუციის პროექტს

თიბისი კაპიტალის ექსკლუზიური მხარდაჭერით, თეგეტა მოტორსმა ადგილობრივ ბაზარზე პირველი 6-თვიანი ობლიგაციები განათავსა