2018-11-12 20:56:29, 1561 ნახვა

---

საგარეო უწყება ლავროვისა და მედოვის შეხვედრაზე: ეს კრემლის უკანონო მცდელობაა, საოკუპაციო რეჟიმების ლეგიტიმაცია მოახდინოს

"რუსეთის საგარეო საქმეთა მინისტრის, სერგეი ლავროვის შეხვედრა ცხინვალის საოკუპაციო რეჟიმის წარმომადგენელთან წარმოადგენს რუსეთის მხრიდან საქართველოს სახელმწიფოებრიობის, სუვერენიტეტისა და ტერიტორიული მთლიანობის წინააღმდეგ მიმართული პოლიტიკის გაგრძელებას",- ამის შესახებ საქართველოს საგარეო საქმეთა სამინისტროს წარმომადგენელმა, ვლადიმერ კონსტანტინიდმა განაცხადა.

როგორც კონსტანტინიდმა აღნიშნა, "ეს არის კრემლის მორიგი უკანონო მცდელობა, საოკუპაციო რეჟიმების ლეგიტიმაცია მოახდინოს და 2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების პირდაპირი დარღვევით, ოკუპირებულ რეგიონებზე საკუთარი კონტროლი დააკანონოს.

„რუსეთის მსგავსი მცდელობები უშედეგოა. საერთაშორისო თანამეგობრობა არასდროს შეეგუება საქართველოს განუყოფელი რეგიონების ე.წ. დამოუკიდებლობის უკანონო აღიარებას. საერთაშორისო თანამეგობრობა მუდმივად მოუწოდებს რუსეთს, უკან წაიღოს თავისი უკანონო გადაწყვეტილება ოკუპირებული ტერიტორიების ე.წ. დამოუკიდებლობის აღიარების შესახებ. საერთაშორისო საზოგადოება ურყევად უჭერს მხარს საქართველოს სუვერენიტეტს, ტერიტორიული მთლიანობას და აფხაზეთისა და ცხინვალის რეგიონების არაღიარების პოლიტიკას, რაც თვალსაჩინოდ აისახება როგორც ცალკეული ქვეყნებისა და საერთაშორისო ორგანიზაციების მხრიდან გაკეთებულ საჯარო განცხადებებსა და დოკუმენტებში, ასევე მათ ქმედით ნაბიჯებში კონფლიქტის მშვიდობიანი მოგვარების მიმართულებით“,- განაცხადა კონსტანტინიდმა.

---

ავტორი: ,

---

დღის თემა

მთავარი თემა

ინტერვიუ - ექსკლუზივი