2018-08-31 18:40:56, 1178 ნახვა

---

შიდა ქართლის გუბერნატორი: შესაბამისმა უწყებებმა ეფექტურად იმუშავეს, რამაც საშუალება მოგვცა, ტყის მასივის დიდი ნაწილი გადაგვერჩინა

ხაშურში, სოფელ ცედანის მახლობლად, ტყის მასივში გაჩენილი ხანძრის სალიკვიდაციო სამუშაოები გრძელდება. ამ დროისთვის, ხანძრის ღია კერები აღარ შეინიშნება.

შიდა ქართლის გუბერნატორის, გიორგი ხოჯევანიშვილის თქმით, სასაზღვრო პოლიციის ვერტმფრენი ადგილზე რჩება და საჭიროების შემთხვევაში, დაუყოვნებლივ ჩაერთვება სამუშაოებში. შინაგან საქმეთა სამინისტროს სასაზღვრო პოლიციის ვერტმფრენი სალიკვიდაციო სამუშაოებში გუშინ ჩაერთო, ხანძრის გავრცელების საფრთხის შემცირებასთან ერთად დღეს სამაშველო ღონისძიებებში  მისი მონაწილეობა საჭირო აღარ არის.

„ამ დროისთვის ხანძრის ძირითადი კერები ლოკალიზებულია და მისი გავრცელების საფრთხე აღარ არსებობს. ჩვენ, საგანგებო სიტუაციების მართვის სამსახურის მეხანძრე-მაშველებთან, სატყეო სამსახურის თანამშრომლებთან და ამ უწყებების  ხელმძღვანელებთან ერთად  ხანძრის გაჩენის პირველივე წუთებიდან ადგილზე ვიმყოფებდით და უშუალოდ ვიყავით ჩართულები ხანძრის ქრობის პროცესში. მნიშვნელოვანია, რომ ცოცხალმა ძალამ და ხანძარსაწინააღმდეგო ტექნიკამ იმუშავა ეფექტურად, რამაც საშუალება მოგვცა გადაგვერჩინა ტყის მასივის დიდი ნაწილი. ამ დროისთვის, მეხანძრე-მაშველები ნახანძრალი ტერიტორიის პრევენციულ დამუშავებას აგრძელებენ. ასევე, უნდა აღინიშნოს, რომ ახალმა სახანძრო მანქანებმა პირველი ტესტი წარმატებით ჩააბარეს“, - აცხადებს ხოჯევანიშვილი.

ადგილობრივი მოსახლეობა ამბობს, რომ ხანძრის ქრობის სამუშაოები ოპერატიულად განხორციელდა.

„უმოკლეს დროში მოხდა მეხანძრე-მაშველებისა და ტექნიკის მობილიზება. როდესაც მე გავიგე ხანძრის გაჩენის შესახებ, ისინი უკვე მუშაობდნენ. რეგიონის გუბერნატორიც აქ ჩამოსულა მაშინვე და ახლაც ზემოთ არის ტყეში ასული როგორც ვიცი. ჩვენ ცეცხლის კერამდე არ გვიშვებენ. სხვა სამსახურების ხელმძღვანელებიც აქ არიან. კარგად იმუშავეს ერთობლივად და ახლა ცეცხლი თითქმის აღარცაა არსად,“- ამბობს სოფელ ცედანის მკვიდრი დავით გოგალაძე.

ხაშურში გაჩენილი ხანძრის კერები ლოკალიზებულია და საგანგებო სიტუაციების მართვის სამსახურის ინფორმაციით, ცეცხლის გავრცელების საფრთხე აღარ არსებობს. ამ დროისთვის არსებული მონაცემებით, დამწვარია 10 ჰა-მდე ტყე.

---

ავტორი: ,

---

დღის თემა

მთავარი თემა

ინტერვიუ - ექსკლუზივი