2018-06-15 16:29:26, 860 ნახვა

---

ტატუნაშვილის წამებაში დახმარებისთვის ბრალდებულ დავით გურწიევს და ალიკ ტაბოევს აღკვეთის ღონისძიების სახით პატიმრობა შეეფარდათ

მცხეთის რაიონულმა სასამართლომ პროკურატურის მოთხოვნა დააკმაყოფილა და არჩილ ტატუნაშვილის ჯგუფურად წამებაში დახმარებისთვის ბრალდებულ ოკუპირებული ცხინვალის ე.წ. სამართალდამცავი ორგანოს თანამშრომლებს  – დავით გურწიევს და ალიკ ტაბოევს, აღკვეთის ღონისძიების სახით დაუსწრებლად წინასწარი პატიმრობა შეუფარდა.

პროკურორის, დავით ყაზარაშვილის თქმით, საქმეში შესაბამისი მტკიცებულებები არსებობს, რაც ადასტურებს, რომ ტატუნაშვილი გურწიევმა და ალეკ ტაბოევმა აწამეს.

„ ჩვენ მიგვაჩნია, რომ საქმეში არის იმ მტკიცებულებათა რაოდენობა რომელიც იძლევიან დასაბუთებული ვარაუდის საფუძველს, რომ ორივე პიროვნებამ ჩაიდინა მათთვის ბრალად შერაცხული დანაშაული. აღნიშნული პოზიცია გაითვალისწინა სასამართლომ  და სწორედ ამიტომ გამოიყენა ორივე მათგანის მიმართ აღკვეთის ღონისძიება პატიმრობა“, - განაცხადა ყაზარაშვილმა.

ცნობისთვის, საქართველოს პროკურატურამ, საქართველოს შსს-ს წარმოებაში არსებულ სისხლის სამართლის საქმეზე ჩატარებული გამოძიებით შეკრებილი მტკიცებულებების საფუძველზე, არჩილ ტატუნაშვილის, ლ.ქ-სა და ი.პ-ს მიმართ, წინასწარი შეთანხმებით ჯგუფის მიერ თავისუფლების უკანონო აღკვეთასა და არჩილ ტატუნაშვილის ჯგუფურად წამებაში დახმარებისთვის, ოკუპირებული ცხინვალის რეგიონის ე.წ. სამართალდამცავი ორგანოს თანამშრომლებს დავით გურწიევს და ალიკ ტაბოევს ბრალი დაუსწრებლად გუშინ წარუდგინა.

შეგახსენებთ, არჩილ ტატუნაშვილი 22 თებერვალს საოკუპაციო რეჟიმის წარმომადგენლებმა დააკავეს, 23 თებერვალს კი ცნობილი გახდა მისი გაურკვეველ ვითარებაში გარდაცვალების თაობაზე. საერთაშორისო საზოგადოების მხრიდან უამრავი მოწოდებისა და საქართველოს ხელისუფლების მცდელობის მიუხედავად, ოჯახს ცხედარი 20 მარტამდე არ გადასცემია. ასევე მასთან ერთად დააკავეს საქართველოს კიდევ ორი მოქალაქე, რომლებსაც 11 მარტამდე არ მიეცათ ქართული მხარის მიერ კონტროლირებად ტერიტორიაზე გადმოსვლის უფლება.

---

ავტორი: ,

---

დღის თემა

მთავარი თემა

ინტერვიუ - ექსკლუზივი