საქართველოს მთავრობა და ეროვნული ბანკი ლარის გაუფასურებასთან დაკავშირებულ საკითხებს ძალიან სწორად გაუმკლავდა, - ამის შესახებ მსოფლიო ბანკის რეგიონულმა დირექტორმა სამხრეთ-კავკასიაში ჰენრი კერალიმ ჟურნალისტებს განუცხადა.

მისი თქმით, საქართველოს მთავრობამ ეკონომიკური ზრდის პროცესის გაგრძელებისათვის სათანადო ზომები მიიღო.

„ჩვენი შეფასებით, მთავრობა და ეროვნული ბანკი ამ პროცესებს ძალიან კარგად გაუმკლავდა. მათ სათანადო ზომები მიიღეს, რათა მონეტარული პოლიტიკა სტაბილური ყოფილიყო და ეკონომიკური ზრდა გაგრძელებულიყო. ჩვენ შეგვიძლია ვნახოთ, რომ პირველ კვარტალში, საქართველოს ეკონომიკური ზრდა 3%-ზე მეტი იყო, როდესაც რუსეთში, უკრაინაში, თურქეთსა და სომხეთში ეს მაჩვენებელი გაცილებით დაბალია. ჩვენ შეგვიძლია ვთქვათ, საქართველოს არის ქვეყანა, რომლის ეკონომიკაც რეგიონში ვითარდება“, - განაცხადა კერალიმ.

მისივე განცხადებით, ამ პროცესების შედეგად ლარმა ბოლო დღეების განმავლობაში გამყარება დაიწყო და ეს იმას ნიშნავს, რომ მთავრობა ამ ვითარებას კარგად გაუმკლავდა.

ამასთან, როგორც კერალიმ აღნიშნა, რეგიონში მიმდინარე მოვლენების გათვალისწინებით, არ არის გასაკვირი, რომ ლარის გაუფასურება ხდებოდა.

„საქართველო იმ გარემოშია, სადაც სერიოზული გამოწვევები არსებობს. ჩვენ ვიცით, რომ ჩრდილოეთში კრიზისი იყო. რუსეთის ეკონომიკაზე გავლენა მოახდინა სანქციებმა და კონფლიქტმა უკრაინასთან, ამან, რა თქმა უნდა გავლენა იქონია საქარტველოზეც. საქართველო არ არის ცალკეული კუნძული, მას აქვს სავაჭრო ურთიერთობები რუსეთთან, უკრაინასთან და სხვა პარტნიორებთან. ამ ყველაფერმა გავლენა იქონია საქართველოში გაცვლით კურსზეც. ეს ასევე იმ საგარეო ფაქტორითაა გამოწვეული, რომ დოლარი გამყარდა ყველა ვალუტის მიმართ. ასე რომ არ არის გასაკვირი, რომ ლარის გაუფასურება ხდებოდა“, - განაცხადა ჰენრი კერალიმ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ჟურნალისტების დადგენილი მოძალადე სპეცრაზმელები დაკავებულები არიან, სისტემამ თავისი საყრდენების ჭამა დაიწყო

პატრიარქობის კანდიდატმა, მიტროპოლიტმა იობმა ზეწოლაზე ისაუბრა - ახსენა სამთავრობო მედია

რეჟიმმა გურამ როგავაზე, ზვიად მაისაშვილზე და ლევან ხაბეიშვილზე 2024 წელს თავდასხმისთვის სპეცრაზმელები დააკავა

უძილაურის ოჯახის ახლობელი: ეს არის ევროპაზე დარტყმა და გიორგი ამ თემაში დაახურდავეს