პაატა შეშელიძე: ლარის გამყარების ტენდენციაზე საუბარი ჯერ ნაადრევია

2015-05-20 13:02:24, 780 ნახვა

ეკონომიკა

„ახალი ეკონომიკური სკოლის“ პრეზიდენტის პაატა შეშელიძის შეფასებით, ლარის კურსის გამყარების ტენდენციაზე საუბარი ჯერ ნაადრევია.

ამის შესახებ შეშელიძემ „ექსპრესნიუსს“ ბოლო დღეების განმავლობაში დოლართან და ევროსთან მიმართებაში ლარის მცირედით გამყარების თემის კომენტირებისას განუცხადა.
მისი თქმით, იმაზე, რომ ლარის გაუფასურება ხელოვნური პროცესი იყო, ეროვნული ბანკის პრეზიდენტის მიერ გაკეთებული განცხადებაც მიუთითებს.
„ლარის კურსის გამყარების ტენდენციაზე საუბარი ჯერ ნაადრევია. საინტერესო იყო, რომ რამდენიმე დღის წინ, სანამ ლარი გამყარებას დაიწყებდა, ეროვნული ბანკის პრეზიდენტმა განცხადება გააკეთა და თქვა, რომ ვალუტამ გაუფასურების მაქსიმუმს მიაღწია და ამის იქით აღარ გვექნება ვარდნებიო. ეს იმის ნიშანია, რომ პროცესი ხელოვნური იყო და ახლა სრულდება. მითუმეტეს, იმ ფონზე, რომ ეკონომიკური ფაქტორები მნიშვნელოვნად არ გაუმჯობესებულა და ეს ლარის გამყარებაზე სერიოზულ გავლენას ვერ მოახდენდა. ქადაგიძემ თქვა, რომ რაღაც შეიცვალა, თუმცა რა შეიცვალა არ აუხსნია. შესაძლოა, ეროვნულმა ბანკმა შეცვალა დამოკიდებულება და იციან, რომ ლარი აღარ გაუფასურდება“, - განაცხადა შეშელიძემ.
რაც შეეხება მთავრობის როლს ლარის კურსის დასტაბილურების პროცესში, პაატა შეშელიძის თქმით, ხელისუფლებას რეალურად არაფერი გაუკეთებია.
„ეს ხელოვნური პროცესი იყო და არ ჯდებოდა ეკონომიკურ ლოგიკაში. მთავრობა ამის ნაწილი იყო და თავადაც იყო დაინტერესებული. მთავრობას არაფერი გაუკეთებია, საუბარი იყო პრივატიზაციაზე და 2-3 შენობა გაიყიდა მხოლოდ“, - განაცხადა შეშელიძემ.