პანკისის ხეობაში დაკავებული ბადურ ჩოფანაშვილის ადვოკატის, დალი ბარბაქაძის განცხადებით, საქმის მასალები 16 ტომს შეადგენს.

როგორც მან ჟურნალისტებს განუცხადა, დროის სიმცირის გამო, საქმის მასალებს ნაწილობრივ გაეცნო.

თუმცა, ბარბაქაძის განცხადებით, მასალებში არ არის რაიმე იმის დამადასტურებელი, რომ ჩოფანაშვილმა დანაშაული ჩაიდინა.

„მასალები საკმაოდ მოცულობითია. 68 cd დისკზე მეტია ჩანაწერი. საქმის მასალები სადღაც 16 ტომია. ბადურ ჩოფანაშვილი იგივე პოზიციაზეა. ვერ ვნახე მასალებში რაიმე დამადასტურებელი იმისა, რომ ჩოფანაშვილმა ჩაიდინა ის დანაშაული, რაც მას ბრალად ედება“, - განაცხადა ადვოკატმა.

დალი ბარბაქაძის ინფორმაციით, საქმის მასალებში ტერაქტის მოწყობასთან დაკავშირებით საუბარი არ არის. ბარბაქაძე განმარტავს, რომ გამოძიება ძირითადად ბინის დაქირავებასთან დაკავშირებით მიმდინარეობს.

„მინდა დავამშვიდო საქართველოს მოსახლეობა, რადგან გაკეთდა განცხადებები, თითქოს ისინი აპირებდნენ ახალი ტერაქტების მოწყობას როგორც თურქეთში, ისე საქართველოში. მსგავსი რამ მასალებში ხსენებული არ არის. მხოლოდ და მხოლოდ აქცენტი გაკეთებულია იმ შემთხვევაზე, რომელიც მოხდა ბერი გაბრეილ სალოსის ქუჩაზე. გამოძიება ძირითადად ბინის დაქირავებას უკავშირდება“, - განაცხადა ადვოკატმა დალი ბარბაქაძემ თბილისის საქალაქო სასამართლოში, სადაც ამ წუთებში, სპეცოპერაციისას დაკავებული ბადურ ჩოფანაშვილის, რუსლან ალდამოვის და რამაზ მარგოშვილის მიმართ აღკვეთის ღონისძიების შეფარდების საკითხზე პროცესი მიმდინარეობს.

შეგახსენებთ, 25 დეკემბერს, გამთენიისას, თბილისსა და ახმეტის რაიონის სოფლებში - დუისსა და ომალოში საქართველოს 5 მოქალაქე დააკავეს. სპეცოპერაციის დროს ერთ-ერთი პირი თავის არეში დაიჭრა და საავადმყოფოში იმყოფება. მისი საქმე სასამართლოში არ განიხილება. სუს-ის იფნორმაციით, დაკავებულები დაკავშირებული არიან 21-22 ნოემბერს, თბილისში, ბერი გაბრიელ სალოსის ქუჩაზე ჩატარებული სპეცოპერაციის შედეგად განეიტრალებული დაჯგუფების წევრებთან და მათ ხელშემწყობ პირებს წარმოადგენენ. უსაფრთხოების სამსახურის ცნობით, დანაშაულებრივ ჯგუფთან კავშირზე მყოფი სხვა პირების გამოვლენის მიზნით, საგამოძიებო მოქმედებები გრძელდება.

ავტორი: ,

სოციალური ქსელები

ლონდონში ანტისემიტიზმის წინააღმდეგ მასობრივი მიტინგი გაიმართა

რეჟიმის წარმომადგენელი პაპუაშვილი - ფიშერის ფაილი დახურულია, გერმანიაში მის გამგზავრებას ველოდებით

საპატრიარქოში აცხადებენ, რომ საეკლესიო კრებაზე 1 200-მდე დელეგატი იქნება

პატრიარქის არჩევასთან დაკავშირებით, 11 მაისს, 09:00 საათიდან 18:00-მდე სამების მიმდებარე ტერიტორიაზე, რამდენიმე მიმართულებით საავტომობილო მოძრაობა შეიზღუდება