რომის პაპი ილია მეორეს: არ მავიწყდება ორმხრივი პირობა, რომელიც თქვენს უძვირფასეს ქვეყანაში ერთმანეთს აღვუთქვით

2017-08-15 18:26:55, 2385 ნახვა

საზოგადოება

როპის პაპმა ფრანცისკემ სრულიად საქართველოს კათოლიკოს პატრიარქს ილია მეორეს წმინდა ილია თეზბიტელის დღესასწაული მიულოცა.

"თქვენი ზეციური მფარველი წმინდანის, დიდი წინასწარმეტყველის, ელიას ხსენების დღესთან დაკავშირებით განსაკუთრებული სიხარულითა და სულიერი სიახლოვის განცდით ვუძღვნი თქვენს უწმინდესობას და უნეტარესობას ჩემს საუკეთესო, გულითად სურვილებს. არ მავიწყდება ჩვენი ორმხრივი პირობა ერთურთისათვის ლოცვისა, რომელიც გასულ წელს, თქვენს უძვირფასეს ქვეყანაში ჩვენი დაუვიწყარი შეხვედრისას ერთმანეთს აღვუთქვით. გარწმუნებთ რომ, პირნათლად ვასრულებ ამ დანაპირებს, განსაკუთრებით ამ საიუბილეო წელს, როცა საქართველოს ეკლესია ზეიმობს თქვენი უწმინდესობისა და უნეტარესობის აღსაყდრების მეორმოცე და დაბადებიდან ოთხმოცდამეხუთე, ასევე ეკლესიის ავტოკეფალიის აღდგენის მეასე წლისთავს.
შევთხოვ უფალს, რომ კვლავაც უხვად მოჰმადლოს თავისი ლოცვა-კურთხევა თქვენს პატრიარქულ მსახურებას, წყალობა და მფარველობა არ მოაკლოს თქვენი მამობრივი მზრუნველობის ქვეშ მყოფ ყველა ადამიანს. დაე, კათოლიკეთა და მართლმადიდებელთა წმინდანის, ელიას მეოხებით კიდევ უფრო განმტკიცდეს ჩვენი ერთობა იესო ქრისტეში, უფლისეულო ძმაო; მსურს კვლავაც გამოვხატო თქვენდამი ღრმა სულიერი სიახლოვის გრძნობა და გიძღვნათ ძმური მშვიდობის ამბორი.
პაპი ფრანცისკე", - ნათქვამია წერილში.

ამასთან, ილია მეორეს დღესასწაული ასევე მსოფლიო პატრიარქმა ბართოლომემ, იერუსალიმის პატრიარქმა თეოფილე მესამემ, მოსკოვისა და სრულიად რუსეთის პატრიარქმა
კირილემ, ბულგარეთის პატრიარქმა ნეოფიტემ, სრულიად საბერძნეთისა და ათენის მთავარეპისკოპოსმა იერონიმე II-მ, საფრანგეთის მიტროპოლიტმა ემანუელმა, ვოლოკოლამის მიტროპოლიტმა ილარიონმა, თეატირონისა და დიდი ბრიტანეთის მთავარეპისკოპოსმა გრიგოლიმ, კიშინიოვისა და სრულიად მოლდოვას მიტროპოლიტმა ვლადიმერმა, ვილენისა და ლიტვის მიტროპოლიტმა ინოკენტიმ მიულოცეს.

სხვა მილოცვების წასაკითხად გადადით ბმულზე >>> მილოცვები წმ. ილია თესბიტელის დღესთან დაკავშირებით