თავდაცვის მინისტრმა დაღუპულ გმირთა მემორიალი გახსნა

2017-08-08 15:43:51, 976 ნახვა

სამხედრო

საქართველოს თავდაცვის მინისტრმა დაღუპული გმირების ხსოვნას პატივი კიდევ ერთხელ მიაგო.

თავდაცვის სამინისტროს ინფორმაციით, ლევან იზორია მუხათგვერდის ძმათა სასაფლაოს შემდეგ, ვარკეთილში, დაღუპული გმირების ხსოვნის პატივსაცემად აგებულ წმინდა მეფე ვახტანგ გორგასლის სახელობის ეკლესიაში იმყოფებოდა. თავდაცვის მინისტრმა ეკლესიის ეზოში 2008 წლის აგვისტოს ომში გმირულად დაღუპული სამხედრო მოსამსახურეების ხსოვნისადმი მიძღვნილი მემორიალი გახსნა.

ქვაჯვარი, სადაც მეომრების სახელები და გვარები ოქროს ასოებით არის ამოტვიფრული, საქართველოს შეიარაღებული ძალების მთავარმა კაპელანმა, დეკანოზმა დავითმა აკურთხა.

თავდაცვის მინისტრი და გენერალური შტაბის უფროსი ეკლესიაში დაღუპული გმირების სულის მოსახსენიებელ პანაშვიდსაც დაესწრნენ. ლევან იზორიამ სამხედრო მოსამსახურეების ოჯახის წევრებს სიტყვით მიმართა, მათი გმირობის ისტორია გაიხსენა, ოჯახებს გმირი შვილების აღზრდისათვის მადლობა გადაუხადა და მხარდაჭერა აღუთქვა.

მემორიალის გახსნას თავდაცვის მინისტრის მოადგილე გიორგი ბუთხუზი, გენერალური შტაბის უფროსის მოადგილეები, საქართველოს შეიარაღებული ძალებისა და ხელისუფლების წარმომადგენლები დაესწრნენ.

(NS)

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან