დემირელის სახელობის კოლეჯის მენეჯერის ადვოკატის სოსო ბარათაშვილის განცხადებით, მათ ლტოლვილთა და განსახლების მინისტრს 260-გვერდიანი დოკუმენტი წარუდგინეს, რომლითაც მისივე თქმით, დასტურდება, რომ მუსტაფა ემრე ჩაბუქსა მისი ოჯახის წევრებს საქართველოში ლტოლვილის სტატუსი უნდა მიენიჭოთ.

როგორც ბარათაშვილმა აღნიშნა, „საერთაშორისო ამნისტიის“ ევროპისა და ცენტრალური აზიის წარმომადგენლის დაბეჯითებითი რეკომენდაციაა, რომ ჩაბუქის ოჯახს ლტოლვილის სტატუსი უნდა მიენიჭოს. 

„საქართველოში გაერო-ს წარმომადგენლობითი ორგანიზაციის რეკომენდაციაა, ასევე სახალხო დამცველის პოზიცია, რომ მუსტაფა ემრე ჩაბუქსა და მისი ოჯახის წევრებს ლტოლვილის სტატუსი მიენიჭოთ“, - განაცხადა ბარათაშვილმა. 

მისივე თქმით, გაერო-სა და ევროსაბჭოს დასკვნები არსებობს, სადაც მიჩნეულია, რომ თურქეთში მასობრივად ირღვევა ადამიანის უფლებები, გახშირებულია საპატიმროებში ადამიანის წამებისა და მკვლელობის შემთხვევები. 

„განსაკუთრებულ შეშფოთებას იწვევს ის ფაქტი, რომ თურქეთის ოფიციალური მედიასაშუალებების მიერ ვრცელდება ინფორმაცია, ბატონი მუსტაფა ემრე ჩაბუქი, მისი მეუღლე და დემირელის კოლეჯის პედაგოგები მოხსენიებულნი არიან როგორც მოღალატეები, რომლებიც ხელს უწყობენ თურქეთის საწინააღმდეგო მოქმედებებს. ასევე მოხსენიებულია ქართული მედია უარყოფით კონტექსტში, რომ ფულით ამზადებენ რეპორტაჟებს და არიან მოსყიდულნი. მივმართავთ სოზარ სუბარს, გულდასმით წაიკითხოს დოკუმენტაცია და ნუ გაწირავს ამ ადამიანებს“, - სოსო ბარათაშვილი. 

ცნობისთვის, მუსტაფა ემრე ჩაბუქის ოჯახის წევრები ლტოლვილთა და განსახლების მინისტრის, სოზარ სუბარის წარმომადგენლებს ხვალ 11:00 საათზე შეხვდებიან. ამასთან, ლტოლვილთა და განსახლების სამინისტრო დემირელის კოლეჯის ხარისხის მართვის მენეჯერის, მუსტაფა ემრე ჩაბუქისთვის ლტოლვილის სტატუსის მინიჭების საკითხზე გადაწყვეტილებას 7 ივლისს მიიღებს.

შეგახსენებთ, თბილისში, 24 მაისს, თურქული მხარის მოთხოვნით, დემირელის კერძო კოლეჯის ხარისხის მართვის მენეჯერი  მუსტაფა ემრე ჩაბუქი დააკავეს. სასამართლო პროცესზე პროკურორმა განაცხადა, რომ ჩაბუქს შეიარაღებული ტერორისტული ორგანიზაციის წევრობა ედება ბრალად და მისი დაპატიმრება მოითხოვა. მოსამართლემ ბრალდების მხარის შუამდგომლობა დააკმაყოფილა და მუსტაფა ემრე ჩაბუქს სამთვიანი წინასაექსტრადიციო პატიმრობა შეეფარდა. დაკავებული პედაგოგი ბრალს არ აღიარებს.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

მაკა ბოჭორიშვილი ჰონდურასის საგარეო საქმეთა მინისტრს შეხვდა

რუსეთმა ნავთობგადამამუშავებელი ქარხნის სიმძლავრის 30% კვლავ დაკარგა უკრაინიდან ერთკვირიანი თავდასხმების შემდეგ

შეერთებულმა შტატებმა პუტინს თანხმობა სთხოვა უკრაინისთვის ნატოს ქარტიის ფარგლებში უსაფრთხოების გარანტიებზე

საქართველოს ბანკი უკვე 10 წელია ლიდერატორის პროგრამით ახალგაზრდებისთვის დასაქმების შესაძლებლობას ქმნის