საქართველოში ვიზიტით მყოფი ვისკონსინის შტატის სასჯელაღსრულების დეპარტამენტის დელეგაცია სასჯელაღსრულებისა და პრობაციის სამინისტროს N16 დაბალი რისკის პენიტენციურ დაწესებულებას ეწვია.

სასჯელაღსრულებისა და პრობაციის სამინისტროს ინფორმაციით, ვისკონსინის დელეგაციას ოშკოშის სასჯელაღსრულების დაწესებულების უსაფრთხოების დირექტორი ჯიმ ზენონი, დოდჯის სასჯელაღსრულების დაწესებულების უსაფრთხოების დირექტორი დილონ რადტკე,  ზრდასრულთა დაწესებულებების სამმართველოს უსაფრთხოების უფროსი მარკ უაისბერგერი და ოშკოშის სასჯელაღსრულების დაწესებულების დანაყოფის უფროსი ერიკ ბარბერი წარმოადგენენ.

მათივე ინფორმაციით, სტუმრებს N16 პენიტენციური დაწესებულების დირექტორმა ლევან წყარუაშვილმა და  სპეციალური დანიშნულების ძალების მეთაურმა ფარნაოზ მოლოდინაშვილმა უმასპინძლეს.

ვიზიტის ფარგლებში დელეგაციის წევრებმა დაწესებულების ტერიტორიაზე არსებული ინფრასტრუქტურა, საცხოვრებელი და სასწავლო ბლოკები, ბიბლიოთეკა, სასადილო, გრძელვადიანი პაემნებისთვის განკუთვნილი ოთახები და სპორტული დარბაზი დაათვალიერეს. ასევე, დეტალურად გაეცნენ რესოციალიზაცია-რეაბილიტაციის მიზნით დანერგილ პროგრამებსა და პროფესიული სწავლების კურსებს.

ვისკონსინის შტატის ოშკოშის სასჯელაღსულების დაწესებულებების დანაყოფის უფროსის ერიკ ბარბერის განცხადებით, საქართველოს სასჯელაღსრულების სამინისტროსა და ვისკონსინის სასჯელაღსრულების დეპარტამენტს შორის რამდენიმეწლიანი მეგობრული და პარტნიორული ურთიერთობა ჩამოყალიბდა.

„N16 დაწესებულებაში უკვე მესამედ ვიმყოფებით. პირველად ჯერ კიდევ მაშინ ვიყავით, როცა დაბალი რისკის დაწესებულების გახსნა იგეგმებოდა და მართვის საკითხებზე მსჯელობა მიმდინარეობდა. დღეს უკვე სახეზეა, თუ როგორ წაიწია წინ მოდერნიზაიის პროცესმა.

 აღსანიშნავია ფართომასშტაბიანი რეფორმები და  სისტემური ცვლილებები. მსგავსი ტიპის დაწესებულება მსჯავრდებულთა რეაბილიტაციასა და დანაშაულებრივი ქცევის არმოფხვრას უწყობს ხელს,“ - აღნიშნა ერიკ ბარბერმა.

ვისკონსინის პენიტენციური დეპარტამენტის წარმომადგენლების სამუშაო ვიზიტი, რომელიც აშშ-ს ნარკოტიკებთან ბრძოლისა და კანონის აღსრულების საერთაშორისო ბიუროს(INL) ორგანიზებით დაიგეგმა, მიზნად პენიტენციურ დაწესებულებებში უსაფრთხოების გაძლიერებას, საგანგებო რეაგირების დანაყოფის შესაძლებლობის ზრდასა და სასჯელაღსრულების სფეროში ამერიკის შეერთებული შტატების გამოცდილების გაზიარებას ისახავს. ერთკვირიანი ვიზიტის ფარგლებში დაგეგმილია სპეციალური დანიშნულების ძალების შეფასება, N2, N14, N3, N16, N6 პენიტენციური დაწესებულებებისა და სასწავლო ცენტრის დათვალიერება, ასევე შეხვედრები სამინისტროსა და უსაფრთხოების დეპარტამენტის ხელმძღვანელობასთან.

(NS) 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

კახა კალაძე ჩინეთის ვიცე-პრეზიდენტის ვიზიტზე: ასეთი რანგის სტუმარი ბოლო 10 წლის განმავლობაში საქართველოს არ ახსოვს

სახალხო დამცველმა ირაკლი ღარიბაშვილის საჯარო განცხადებაში მითითებული საკითხების შესწავლა დაიწყო

ივანიშვილის წარმომადგენელი გორდულაძე განაჩენის გამოტანამდე ოპოზიციურ პარტიებს არაკონსტიტუციურებს უწოდებს

მიგრაციის დეპარტამენტის თანამშრომლებმა უცხო ქვეყნის 91 მოქალაქე საქართველოდან გააძევეს