გიორგი აბაშიშვილი ევროსასამართლოს გადაწყვეტილებაზე: ეს არის მნიშვნელოვანი მონაპოვარი

2017-03-07 23:46:52, 2210 ნახვა

სამართალი

ეს არის მნიშვნელოვანი მონაპოვარი და ვფიქრობთ, რომ ეს ასე უნდა გაგრძელდეს საბოლოო გადაწყვეტილებამდე, - ასე აფასებს საქართველოს პრეზიდენტის ადმინისტრაციის უფროსი, გიორგი აბაშიშვილი, ევროსასამართლოს მიერ რუსთავი 2-ის საქმეზე შეჩერების გადაწყვეტილების უვადოდ გაგრძელებას.

როგორც აბაშიშვილმა გადაცემა "არჩევანში" განაცხადა, გიორგი მარგველაშვილი შეშფოთებით უყურებს ევროპელი პარტნიორების მხრიდან გაკეთებულ განცხადებებს.

„ძალიან შემაშფოთებელი იყო ის განცხადებები, რომელიც ისმოდა ჩვენი პარტნიორების მხრიდან, მაგრამ მე ვხედავ, რომ ეს განცხადებები კიდევ უფრო მეტად დამძიმდება, თუ ჩვენა ქედან შესაბამის დასკვნებს არ გამოვიტანთ“, - განაცხადა გიორგი აბაშიშვილმა.

აბაშიშვილმა აქვე ირაკლი კობახიძის ნათქვამი გააკრიტიკა, რომ სტრასბურგში რუსთავი 2-ის სარჩელის განხილვა საქართველოს წინააღმდეგ მიმდინარეობს.

„მაღალი თანამდებობის პირების მხრიდან ასეთი განცხადებები, მე არ ვიცი, რა კომენტარები შეიძლება მოყვეს ამას. კიდევ ერთხელ ვიმეორებ, საქართველო არის საქართველოს მოქალაქეების, საქართველოს ევროპული არჩევანი და საქართველოს დემოკრატიული არჩევანი და საქართველოში სიტყვის თავისუფლების გამარჯვების“, - განაცხადა გიორგი აბაშიშვილმა.

ირაკლი კობახიძის ამ განცხადებას თავდაცვის ყოფილი მინისტრი, თინა ხიდაშელიც გამოეხმაურა, რომელმაც იკითხა, თუ რომელ უნივერსიტეტში უთხრეს, რომ სტრასბურგში საქმე ქვეყნის ინტერესების საწინააღმდეგოა?

კობახიძემ ხიდაშელის მისამართით განაცხადა, რომ ის ერთმანეთისგან ვერ არჩევს იურიდიულ და პოლიტიკურ განცხადებებს და სწორედ ამიტომ მიიღო 1.5% არჩევნებში.