საქართველოს შეიარაღებული ძალების IV მექანიზირებულ ბრიგადაში არასამთავრობო ორგანიზაციების წარმომადგენლებთან შეხვედრა გაიმართა.

თავდაცვის სამინისტროს ინფორმაციით, სამოქალაქო სექტორის წარმომადგენლებს შეიარაღებული ძალების გენერალური შტაბის უფროსი, გენერალ-მაიორი ვახტანგ კაპანაძე შეხვდა.

შეხვედრას ეროვნული გვარდიის სარდალი, ბრიგადის გენერალი ლევან გამყრელიძე, J-3 უფროსი, ბრიგადის გენერალი გიორგი სურმავა, წვრთნისა და სამხედრო განათლების სარდალი, პოლკოვნიკი ლევან ბერია და სხვა სამხედრო მაღალჩინოსნები დაესწრნენ.

შეხვედრაზე გენერალური შტაბის უფროსი სტუმრებს საქართველოსთვის უელსის სამიტზე მინიჭებული არსებითი პაკეტის იმპლემენტაციის შესახებ ესაუბრა. ყურადღება ნატო-საქართველოს თანამშრომლობის ფორმატზე, ასევე, შეიარაღებული ძალების ოპერატიულ შესაძლებლობებსა  და ნატოსთან თავსებადობაზე გამახვილდა. განსაკუთრებით აღინიშნა ნატოსა და ევროკავშირის მისიებში ქართველი სამხედრო მოსამსახურეების მონაწილეობის საკითხი. გენერალ-მაიორმა ვახტანგ კაპანაძემ სამოქალაქო სექტორის წარმომადგენლებთან შეიარაღებული ძალების ტრანსფორმაციის შესახებაც ისაუბრა. გენრალ-მაიორმა თავდაცვის სისტემის გამჭვირვალობის მნიშვნელობა აღნიშნა და საზოგადოებასთან ინტერაქციის გააქტიურების, ერთობლივი საქმიანი ღონისძიებების დაგეგმვაზე ყურადღება გაამახვილა.

შეხვედრა კითხვა-პასუხის რეჟიმში გაგრძელდა. შეიარაღებული ძალების ხელმძღვანელმა პირებმა სამოქალაქო სექტორის წარმომადგენლების რეკომენდაციები მოისმინეს და ამ კუთხით თანამშრომლობის გაღრმავების სურვილი გამოთქვეს.

მოგვიანებით, გენერალ-მაიორმა ვახტანგ კაპანაძემ მედიის წარმომადგენლებთან ღონისძიება შეაფასა - „შეხვედრა დატვირთული იყო კითხვა-პასუხით. არასამთავრობო სექტორის წარმომადგენლებს გავაცანით არსებული ვითარება ნატოს მიმართულებით; ასევე, ვისაუბრეთ იმ რეფორმების შესახებ, რომელიც შეიარაღებულ ძალებში ტარდება. შევეცადეთ საზოგადოებაში, ექსპერტთა შორის დაგროვილ კითხვებზე პასუხები გაგვეცა“.

არასამთავრობო სექტორის წარმომადგენლების თქმით, აღნიშნული ღონისძიებები ხელს უწყობს სამხედრო-სამოქალაქო ურთიერთობების განვითარებას, რაც თავის მხრივ დადებით ასახვას ჰპოვებს ქვეყანაში დემოკრატიული ინსტიტუტების განვითარებაზე.

 „თავისთავად, ის პროცესები, რომელიც შეიარაღებულ ძალებში მიმდინარეობს არის საზოგადოების მაღალი ინტერესის საგანი. მნიშვნელოვანი იყო ის, რომ უშუალოდ სამხედროებისგან მივიღეთ ინფორმაცია, თუ რა რეფორმები მიმდინარეობს შეიარაღებულ ძალებში“, - აღნიშნა სამხედრო ჟურნალისტთა ასოციაციის თავმჯდომარემ, გიორგი ცხვიტავამ.

შეხვედრის დასრულების შემდეგ, არასამთავრობო სექტორის წარმომადგენლებმა ბრიგადის სასადილოში ჯარისკაცის ულუფა დააგემოვნეს.

საქართველოს თავდაცვის სამინისტროს ერთ-ერთ პრიორიტეტს გამჭვირვალობა წარმოადგენს. ამ მიზნით, უწყება აქტიურად თანამშრომლობს არასამთავრობო ორგანიზაციების წარმომადგენლებთან და მათთან რეგულარულად სამუშაო შეხვედრებს მართავს.

სამოქალაქო საზოგადოებასთან აქტიური თანამშრომლობა ხელს უწყობს თავდაცვის ტრანსფორმაციის პროცესის ეფექტიანად წარმართვას და რეფორმების წარმატებით განხორციელებას.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ყირიმში, ნავთობბაზისა და ბორნის დაბომბვის შემდეგ, მათ შეწყვიტეს საწვავის გაყიდვა და დახურეს ქერჩის გადასასვლელი

აფხაზეთის საოკუპაციო რეჟიმი - თბილისიდან მშვიდობა მხოლოდ ძალის გამოუყენებლობის შესახებ შეთანხმებაა

ალბანეთში ათიათასობით ადამიანმა კუშნერ-ივანკა ტრამპთან დაკავშირებული კურორტის წინააღმდეგ საპროტესტო აქცია გამართა

მოვითხოვთ, 4 ოქტომბრის საქმის საფუძვლიან და ობიექტურ გადახედვას - მეცნიერებათა აკადემია