ქართველი ვიცე-პოლკოვნიკის გია ცერცვაძის განცხადებით, რუსეთის ამოცანაა, მაქსიმალურად აიყვანოს ის პირები, ვისაც საქართველოს უსაფრთხოებაზე ჰქონდა და აქვს ინფორმაცია.

 „რუსთავი 2“-თან ინტერვიუში ცერცვაძემ რუსეთის მხრიდან დევნის კიდევ ერთ მიზეზზე ისაუბრა, რომელიც მისი თქმით, 2008 წლის აგვისტოს ომს და შურისძიებას უკავშირდება.

ვიცე-პოლკოვნიკის განმარტებით, რუსეთს უნდა ყველა იმ ხალხის დასჯა, რომელიც მის წინააღმდეგ იბრძოდა.

„რუსეთის ამოცანაა, პირველ რიგში მაქსიმალურად აიყვანოს ის პირები, ვისაც ქონდა და აქვს ინფორმაცია საქართველოს უსაფრთხოებაზე. ანუ სტრატეგიული ობიექტების, საბრძოლო დანაყოფების, სტრუქტურის და ა.შ. ყველაფერზე, რაც საქართველოს საიდუმლოებას წარმოადგენს. მეორე მოტივი ის არის, რომ უნდათ დასაჯონ ის ხალხი, ვინც აქტიურად მონაწილეობდა რუსეთის წინააღმდეგ ბრძოლებში“, - განაცხადა გია ცერცვაძემ.

ცერცვაძის თქმით, ის საქართველოს ხელისუფლების დამოკიდებულებით შოკირებულია და ვერასდროს წარმოიდგენდა, რომ ქართველი სამართალდამცავები მას არ მიაწვდიდნენ ინფორმაციას იმის შესახებ, რომ ინტერპოლით ძებნა ხორციელდებოდა.

ამასთან, სამხედრო ამბობს, რომ რუსეთის წინააღმდეგ ყველა ომში და მსოფლიოს ნებისმიერ წერტილში იბრძოლებს.

„ჩემთვის დიდი შოკი იყო პირველ რიგში ეს, რომ ასე მოხდა, მაგრამ თუ ბედისწერაა, უმჯობესია ომში დაიღუპო, ვიდრე ასე ცხვარივით დაგკლან. ეს იყო დასანანი. რაც არ უნდა მოხდეს, მე მაინც საქართველოს შეიარაღებული ძალების ოფიცერი ვარ. მთავრობაში ხალხი მოდის და მიდის, საქართველო მაინც დარჩება და სანამ შემიძლია, დღეს უკრაინაა, ხვალ აფრიკა, სადაც არ უნდა იყოს, მე ყველგან ვიქნები, სადაც ბრძოლა იქნება რუსეთის წინააღმდეგ“, - აცხადებს ცერცვაძე.

შეგახსენებთ, რომ გია ცერცვაძე პატიმრობიდან გუშინ გაათავისუფლეს. ქართველი ჯარისკაცი უკრაინაში 15 იანვარს დააკავეს. იგი რუსეთის მოთხოვნის საფუძველზე, ინტერპოლის ძებნილა სიაში იყო. რუსული მხარე მას მკვლელობასა და მკვლელობის მცდელობაში ედავება და ცერცვაძის ექსტრადირებას ითხოვს. რუსეთის მტკიცებით, გია ცერცვაძემ, რომელიც 2008 წელს აგვისტოს ომში და შემდეგ უკრაინის ომში იბრძოდა, 2003 წელს სოჭში ადამიანი მოკლა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

Bloomberg: უკრაინა შეერთებულ შტატებთან შეთანხმდა, რომ შავ ზღვაში ყაზახურ ნავთობტანკერებზე თავდასხმას არ განახორციელებს

პაპუაშვილი - ნაციონალური მოძრაობა შეეგუა 2008 წლის ომის შემდეგ საქართველოს წინააღმდეგ მიღებულ სანქციებსა და ემბარგოს

ფონ დერ ლაიენი: აშშ-მ და ევროკავშირმა ერთობლივად მიზანში უნდა ამოიღონ რუსეთის შემოსავლის ყველა წყარო

დრონების თავდასხმის შემდეგ ილსკის და სიზრანის ნავთობგადამამუშავებელ ქარხნებს ცეცხლი გაუჩნდა.