ზურაბ პოლოლიკაშვილი: მეგობარი და პარტნიორი ქვეყნების მხარდაჭერის ძალიან დიდი მოლოდინი მაქვს

2016-11-14 20:05:24, 1737 ნახვა

ეკონომიკა

ტურიზმის მსოფლიო ორგანიზაციის გენერალური მდივნის კანდიდატის საქართველოდან ზურაბ პოლოლიკაშვილის განცხადებით, მას პარტნიორი ქვეყნების მხარდაჭერის დიდი იმედი აქვს, თუმცა პოლოლიკაშვილი ამბობს, რომ წინ საკმაოდ რთული არჩევნებია მოსალოდნელი და საარჩევნო კამპანიას უკვე დღეიდან იწყებს.

"ეს არის ჩემთვის უდიდესი პასუხისმგებლობა. დღეიდან, ფაქტობრივად ჩვენ ვიწყებთ საარჩევნო კამპანიას, ეს ძალიან დიდი თანამდებობაა, საკმაოდ რთული არჩევნები გველის წინ, თუმცა ხაზგასმით შემიძლია აღვნიშნო, რომ ალბათ სხვა ნებისმიერ კანდიდატს არ ექნება ასეთი სრული მხარდაჭერა თავისი ქვეყნიდან, როგორიც ეს მე დღეს ვიგრძენი, რისთვისაც მინდა ძალიან დიდი მალდობა გადავუხადო მთვრობას, ყველას, ვინც ჩემ გვერდით დადგა ამ ძალიან საპასუხისმგებლო არჩევნების წინ. მე ვარ წარმომადგენელი საერთაშორის ტურიზმის ორგანიზაციაში, საკმაოდ კარგად ვიცნობ ორგანიზაციის მუშაობის სპეციფიკას, მონაწილეობა მაქვს მიღებული ყველა ღონისძიებაში, რომელიც მათი ორგანიზებულია, შანსებს რაც შეეხება, საკმაოდ რთული არჩევნები იქნება, თუმცა ჩვენი მეგობარი და პარტნიორი ქვეყნების მხარდაჭერის ძალიან დიდი მოლოდინი მაქვს", -აღნიშნა ზურაბ პოლოლიკაშვილმა.

ცნობისთვის, ტურიზმის მსოფლიო ორგანიზაციის გენერალური მდივნის თანამდებობაზე 2018-2021 წლების ვადით წარდგენილი კანდიდატების შერჩევის პროცესი, ორგანიზაციის აღმასრულებელ საბჭოში, 2017 წლის მაისში გაიმართება. გენერალური მდივნის თანამდებობაზე 33 ქვეყნის კანდიდატი იქნება წარდგენილი. აღმასრულებელი საბჭოს მიერ რეკომენდირებული კანდიდატის არჩევნები, ორგანიზაციის გენერალური ანსამბლეის ფარგლებში 2017 წლის შემოდგომაზე გაიმართება.