ქართული არტილერია 23 წლის იუბილეს აღნიშნავს.

არტილერიის დღისადმი მიძღვნილი საზეიმო ღონისძიება ვაზიანში, I საარტილერიო ბრიგადის სამწყობრო მოედანზე გაიმართა.

ღონისძიების დაწყებამდე, საქართველოს პრეზიდენტმა გიორგი მარგველაშვილმა და თავდაცვის მინისტრმა მინდია ჯანელიძემ დაღუპულ არტილერისტთა მემორიალი გვირგვინით შეამკეს. საქართველოს ტერიტორიული მთლიანობისთვის ბრძოლასა და სამსახურეობრივი მოვალეობის დროს დაღუპული სამხედრო მოსამსახურეების ხსოვნას პატივი მიაგეს საქართველოს შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ, თავდაცვის სამინისტროსა და გენერალური შტაბის ხელმძღვანელმა პირებმა, ბრიგადის პირადმა შემადგენლობამ და მოწვეულმა სტუმრებმა. სამხედრო ორკესტრის მიერ საქართველოს სახელმწიფო ჰიმნი შესრულდა.

არტილერისტებს პროფესიული დღე საქართველოს უმაღლესმა მთავარსარდალმა მიულოცა. გიორგი მარგველაშვილმა სამხედრო მოსამსახურეებს ქვეყნის წინაშე ღირსეული სამსახურისთვის მადლობა გადაუხადა და მომავალ საქმიანობაში წარმატებები უსურვა.

სიტყვით გამოსვლისას თავდაცვის მინისტრმა მინდია ჯანელიძემ და გენერალური შტაბის უფროსმა, გენერალ-მაიორმა ვახტანგ კაპანაძემ ყურადღება საქართველოს შეიარაღებულ ძალებში არტილერიის მნიშვნელობასა და მის გაძლიერებაზე გაამახვილეს.

საზეიმო ღონისძიება დაჯილდოების ცერემონიალით გაგრძელდა. საქართველოს პრეზიდენტმა ოფიცრები თავდაცვის სფეროში შეტანილი განსაკუთრებული წვლილისათვის ღირსების ორდენით დააჯილდოვა.

თავდაცვის მინისტრმა მინდია ჯანელიძემ ვიცე-პოლკოვნიკებს მამუკა აფციაურსა და თამაზ ხმიადაშვილს, სამსახურებრივი მოვალეობის შესრულებისას გამოვლენილი მაღალი პროფესიონალიზმის გამო, საშტატო იარაღები - სნაიპერული შაშხანები გადასცა.

საზეიმო ღონისძიებაზე სამხედრო მოსამსახურეებმა თავდაცვის სამინისტროს უწყებრივი მედლები "გენერალი კვინიტაძე", „გენერალი მაზნიაშვილი“ და „სამშობლოსათვის თავდადებული“ მიიღეს. დღესვე, არტილერისტებს გენერალური შტაბის უფროსის, სახმელეთო ჯარების აღმოსავლეთ სარდლისა და I საარტილერიო ბრიგადის მეთაურის სახელით, მადლობა გამოეცხადათ.

ქართველმა არტილერისტებმა პროფესიული დღე ხონში, II საარტილერიო ბრიგადაშიც აღნიშნეს. პირად შემადგენლობას დაბადების დღე საქართველოს შეიარაღებული ძალების გენერალური შტაბის უფროსის პირველმა მოადგილემ, ბრიგადის გენერალმა ვლადიმერ ჩაჩიბაიამ და სახმელეთო ჯარების დასავლეთის სარდალმა, პოლკოვნიკმა მიხეილ სადუნიშვილმა მიულოცეს.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ყირიმში, ნავთობბაზისა და ბორნის დაბომბვის შემდეგ, მათ შეწყვიტეს საწვავის გაყიდვა და დახურეს ქერჩის გადასასვლელი

აფხაზეთის საოკუპაციო რეჟიმი - თბილისიდან მშვიდობა მხოლოდ ძალის გამოუყენებლობის შესახებ შეთანხმებაა

ალბანეთში ათიათასობით ადამიანმა კუშნერ-ივანკა ტრამპთან დაკავშირებული კურორტის წინააღმდეგ საპროტესტო აქცია გამართა

მოვითხოვთ, 4 ოქტომბრის საქმის საფუძვლიან და ობიექტურ გადახედვას - მეცნიერებათა აკადემია