უსუფაშვილი: ფარულ მიყურადების ინდუსტრიას, რომელიც „ნაციონალურმა მოძრაობამ“ შექმნა, „ოცნებამ“ წერტილი ვერ დაუსვა

2016-09-27 12:24:31, 628 ნახვა

პოლიტიკა

მე ვთვლი, რომ ფარულ მიყურადებას და ჩანაწერების შექმნა-გავრცელების ინდუსტრიას, რომელიც „ნაციონალურმა მოძრაობამ“ შექმნა, „ქართულმა ოცნებამ“ წერტილი ვერ დაუსვა, - ამის შესახებ საქართველოს პარლამენტის თავმჯდომარემ დავით უსუფაშვილმა ჟურნალისტებს განუცხადა.

როგორც უსუფაშვილმა აღნიშნა, მოსახლეობამ 8 ოქტომბერს ხმის მიცემის დროს აღნიშნულ ფაქტსაც უნდა მიაქციოს ყურადღება.

„ეს ინდუსტრია შეიქმნა წინა ხელისუფლების მიერ და ხელოვნების დონეზე ავიდა. „ქართული ოცნების“ ხელისუფლებამ ვერ შეძლო ამასთან გამკლავება. ამიტომ, არჩევნებზე ხმის მიცემის დროს ამაზეც უნდა ვიფიქროთ, კარგად დავაკვირდეთ თუ ვინ არის ამაზე წამსვლელი. ვინც ამაზე წამსვლელია, ვინც არ უნდა იყოს, მას არაფერი ესქმება ხელისუფლებაში“, - განაცხადა უსუფაშვილმა.

ცნობისთვის, სოციალურ ქსელ Youtube-ში მორიგი სატელეფონო საუბრის ჩანაწერი გავრცელდა.

ჩანაწერში სავარაუდოდ, საქართველოს ყოფილი პრეზიდენტის, მიხეილ სააკაშვილისა და „ნაციონალური მოძრაობის“ ლიდერების სატელეფონო საუბარია ასახული, რომლებიც რევოლუციურ სცენარზე საუბრობენ.

ჩანაწერის ავთენტურობა ჯერ-ჯერობით დადასტურებული არ არის.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან