ევრო 2016-ის მიმდინარეობისას უსაფრთხოების უზრუნველყოფაში საფრანგეთის პოლიციას ევროპოლი დაეხმარება

2016-06-07 15:59:52, 1258 ნახვა

მსოფლიო

ევროპოლი საფრანგეთს ევროპის საფეხბურთო ჩემპიონატის დროს უსაფრთხოების უზრუნველყოფაში დაეხმარება, - ამის შესახებ France 24 ევროპის პოლიციის სამსახურის ხელმძღვანელზე, რობ უენრაითზე დაყრდნობით იუწყება.

უენრაითის თქმით, საფრანგეთის ხელისუფლებამ უსაფრთხოების უზრუნველსაყოფად კოლოსალურ ზომებს მიმართა.

"როგორც ცოტა ხნის წინ საფრანგეთის პრეზიდენტმა განაცხადა, ჩვენ აუცილებლად უნდა გავითვალისწინოთ ამ ღონისძიების დროს თავდასხმების შესაძლებლობა. საფრანგეთის ხელისუფლებამ უსაფრთხოების უზრუნველსაყოფად კოლოსალურ ზომებს მიმართა. მათ ევროპაში უსაფრთხოების ერთ-ერთი საუკეთესო სისტემა გააჩიათ, ევროპოლი მათ გვერდით იქნება”, - განაცხადა რობ უენრაითმა.

ევროპოლის ვებგვერდზე გამოქვეყნებულ განცხადებაშია ნათქვამი, რომ ევროპოლისა და საფრანგეთის სპეცსამსახურებს შორის ევრო-2016-ის დროს მოხდება კრიტიკულად მნიშვნელოვანი ინფორმაციის რეალური დროის რეჟიმში გაცვლა.

როგორც საფრანგეთის ხელისუფლებამ განაცხადა, ევროპის საფეხბურთო ჩემპიონატის დროს ქვეყანაში უსაფრთხოებას პოლიციის, ჟანდარმერიისა და სამოქალაქო თავდაცვის სამსახურის 77 000 თანამშრომელი, ასევე დაცვის კერძო სამსახურების 13 000 თანამშრომელი უზრუნველყოფს.

შეგახსენებთ, რომ ევრო-2016-ს საფრანგეთი 10 ივნისიდან 10 ივლისამდე უმასპინძლებს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან