საქართველოს თავდაცვის სამინისტრო ცენტრალური აფრიკის რესპუბლიკაში ევროკავშირის ეგიდით მიმდინარე სამხედრო-მრჩეველთა მისიაში სამხედრო კონტინგენტის გაზრდას გეგმავს.

თავდაცვის სამინისტროს ინფორმაციით, საქართველოს პარლამენტის მიერ შესაბამისი გადაწყვეტილების მიღების შემდეგ საქართველოს შეიარაღებული ძალების 5-კაციანი კონტინგენტი ოცეულამდე გაიზრდება. მისიის მონაწილეთა რაოდენობის გაზრდის საკითხი დღის წესრიგში 30 მაისს, ბრიუსელში გამართული კონფერენციის დროს დადგა.

ამჟამად ევროკავშირის ეგიდით მიმდინარე ცენტრალური აფრიკის რესპუბლიკის სამშვიდობო მისიაში საქართველო  5 სამხედრო მოსამსახურითაა წარმოდგენილი, რომლებიც სწრაფი რეაგირების ჯგუფს შეადგენენ და მაღალი რანგის სამხედროების ესკორტირება და დაცვა ევალებათ.  

თავდაცვის სამინისტრომ ცენტრალური აფრიკის რესპუბლიკაში სამხედროების კონტინგენტის გაზრდის საკითხზე ინფორმაცია უკვე მიაწოდა უშიშროების საბჭოს და თანხმობაც მიიღო. უახლოეს დღეებში სამინისტრო საბჭოს ოფიციალურად მიმართავს, რათა პრეზიდენტმა  მისიაში ჩართული კონტინგენტის გაზრდის საკითხი  პარლამენტს მოკლე ვადებში წარუდგინოს და გადაწყვეტილების მიღება საგაზაფხულო სესიის დასრულებამდე მოესწროს, რადგან ცენტრალურ აფრიკაში დღეს მოქმედი მისია 12 ივლისს იცვლება, საქართველოს პარლამენტი კი სესიას 24 ივნისს ასრულებს.

„ამ კვირაში ოფიციალურად მივმართავ უშიშროების საბჭოს, რადგან მათგან გვაქვს თანხმობა, რომ პრეზიდენტმა საკითხი წარადგინოს ქვეყნის პარლამენტში; ჩვენ  სამუშაო რეჟიმში ვართ ევროკავშირის მისიასთან. ორ კვირაში, ბრიუსელში მექნება შეხვედრები და უკვე საბოლოოდ გადაწყდება ჩვენი საკითხები. ეს არის საპასუხისმგებლო მისია, ძალიან მნიშვნელოვანი და ძალიან პრესტიჟული, როდესაც ევროკავშირის არაწევრი ქვეყნიდან ითხოვენ კონტინგენტის გაზრდას არა მხოლოდ სამხედრო ძალის  თვალსაზრისით, არამედ, სწორედ, მრჩევლების, ინსტრუქტორების დასახმარებლად,  ცენტრალური აფრიკის შეიარაღებული ძალების გასაწვრთნელად. ეს  ჩვენთვის, რა თქმა უნდა, პატივია და, ბუნებრივია, ამ გამოწვევისთვის მზად ვართ“,- განაცხადა საქართველოს თავდაცვის მინისტრმა თინათინ ხიდაშელმა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

პეკინისა და ვაჟა-ფშაველას გამზირების კვეთიდან ჟვანიას მოედნის მიმართულებით მოძრაობა დროებით შეიზღუდება

რამზან კადიროვის შვილს ჩეჩნეთის რესპუბლიკის გმირის წოდება მიენიჭა

ე.წ ფასეულობების დაცვის მიზნით ოცნების პარლამენტი კანონპროექტის მიღებას აპირებს

ავალიანის საქმეზე იმნაძეს და ბერუაშვილს აღკვეთის სახით პატიმრობა შეუფარდეს