აზერბაიჯანი სომხეთის წინააღმდეგ სანქციების დაწესების ინიციატივით გამოვიდა

2016-05-23 22:22:50, 1356 ნახვა

მსოფლიო

"სომხეთს სანქციები უნდა დაუწესდეს, თუ ის არ შეასრულებს რეზოლუციის პირობებს" - ამის შესახებ აზერბაიჯანის პრეზიდენტმა ილჰამ ალიევმა სტამბოლში, მსოფლიოს ჰუმანიტარულ ფორუმზე სიტყვით გამოსვლისას განაცხადა.

ალიევმა აღნიშნა, რომ მთიანი ყარაბაღის კონფლიქტთან დაკავშირებული გაეროს 4 რეზოლუცია კვლავ შეუსრულებელია.

სიტყვით გამოსვლისას მან აღნიშნა, რომ სომხეთი კვლავ განაგრძობს შეტევების განხორციელებას მშვიდობიან მოსახლეობაზე. ალიევის განცხადებით, სომხების დაბომბვების შედეგად იღუპებიან ადამიანები, დანგრეულია 500-ზე მეტი საცხოვრებელი სახლი.

“სომხები იერიშების განხორციელებისას აკრძალულ იარაღს, მათ შორის ფოსფორის ნაღმებს იყენებდნენ, რაც დოკუმენტურად არის ასახული.”– განაცხადა ალიევმა.

მისივე განცხადებით, 20 წელზე მეტია რაც სომხეთი აზერბაიჯანელების ეთნიკურ წმენდას და გენოციდს ახორციელებს.

“20 წელზე მეტია, რაც სომხეთი აზერბაიჯანელების ეთნიკურ წმენდასა და გენოციდს ახორციელებს. მილიონზე მეტი აზერბაიჯანელი იძულებით გადაადგილებულ პირად ითვლება.” - აღნიშნა პრეზიდენტმა.