სამებაში გაჩენილი ხანძრის გამო, მთავრობამ საპატრიარქოს 3 737 400 ლარი გამოუყო

2016-05-18 15:22:09, 1016 ნახვა

საზოგადოება

სამების საკათედრო ტაძარში ხანძრის შედეგად დაზიანებული ინფრასტრუქტურის რესტავრაციისთვის, მთავრობის სარეზერვო ფონდიდან საპატრიარქოს 3 737 400 ლარი გამოეყო.

შესაბამისი განკარგულება მთავრობის ადმინისტრაციის ვებ-გვერდზე გამოქვეყნდა.

”სამების საკათედრო-საპატრიარქო ტაძარში გაჩენილი ხანძრის შედეგად დაზიანებული ინფრასტრუქტურის რესტავრაცია-აღდგენის და მასთან დაკავშირებული ხარჯების დაფინანსების მიზნით, საქართველოს ფინანსთა სამინისტრომ ”საქართველოს 2016 წლის სახელმწიფო ბიუჯეტის შესახებ” საქართველოს კანონით გათვალისწინებული საქართველოს მთავრობის სარეზერვო ფონდიდან საქართველოს საპატრიარქოს გამოუყოს 3 737 400 (სამი მილიონ შვიდას ოცდაჩვიდმეტი ათას ოთხასი) ლარი”, - ნათქვამია მთავრობის განკარგულებაში, რომელსაც ხელს პრემიერ-მინისტრი გიორგი კვირიკაშვილი აწერს.

ცნობისთვის, სამების საკათედრო ტაძრის პირველ სართულზე ხანძარი 20 მარტს გაჩნდა.ხანძრის შედეგად 1200 კვადრატული მეტრი ფართობი დაიწვა.