„ნაციონალური მოძრაობა“ პრეზიდენტს პარლამენტის რიგგარეშე სხდომის მოწვევის თხოვნით მიმართავს

2015-02-24 15:33:18, 537 ნახვა

პოლიტიკა

„ქვეყანაში ეკონომიკური კრიზისი მძვინვარებს, ჩვენი მოქალაქეების სწრაფი გაღარიბება ხდება“, – ამის შესახებ „ნაციონალური მოძრაობის“ ლიდერმა გოკა გაბაშვილმა პარტიის ოფისში ეროვნული ვალუტის გაუფასურებასთნ დაკავშირებით გამართულ ბრიფინგზე განაცხადა.
მან პარტიის სახელით, 27 თებერვალს არსებულ ეკონომიკურ ფონზე პრეზიდენტს პარლამენტის რიგგარეშე სხდომის მოწვევის თხოვნით მიმართა.
გაბაშვილის თქმით, მოწვეულ რიგგარეშე სხდომზე, რომელსაც აუცილებლად უნდა დაესწრონ პრემიერ–მინისტრი ირაკლი ღარიბაშვილი და ეკონომიკური ბლოკის მინისტრები, კრიზისიდან დაღწევის გზებზე უნდა იმსჯელონ.
„დღეს უკვე ნათელია, რომ ქვეყანაში მძვინვარებს ეკონომიკური და ფინანსური კრიზისი. ლარის გაუფასურება პირდაპირ ურტყავს ჩვენი მოსახლეობის ინტერესს, ჩვენი მოქალაქეების სწრაფი გაღარიბება ხდება. ეს კრიზისი უკვე ჩამოყალიბებულია და ეს არის შედეგი მთავრობის არაკომპეტენტურობის, უნიათობის და 2 წლის განმავლობაში გაუმართლებელი, დამღუპველი პოლიტიკისა. ამ კრიზისის გათვალისწინებით, როგორც სასწრაფო და აუცილებელ ღონისძებად მიგვაჩნია,რომ პრეზიდენტმა 27 თებერვალს საქართველოს პარლამენტის რიგგარეშე სხდომა უნდა მოიწვიოს, რომელსაც ვფიქრობთ, აუცილებლად უნდა დაესწრონ პრემიერ–მინისტრი ირაკლი ღარიბაშვილი, ვიცე პრემიერები, ეკონომიკური ბლოკის მინისტრები, იმისათვის, რომ საქართველოს პარლამენტმა სერიოზულად იმსჯელოს ამ კრიზისულ ვითარებაზე და მოძებნოს გამოსავლის გზები. ეს კრიზისი ძლიერდება ყოველდღიურად, რადგან მთავრობას არ აქვს არანაირი სამოქმედო გეგმა, არ დგავს არანაირ ნაბიჯებს იმისათვის, რომ პრობლემებს გაუმკლავდეს და ცინიკურად მოსახლეობას მიმართავს, რომ ფულის დაბანდება უკეთ ისწავლოს, როგორც ამის შესახებ ბიძინა ივანიშვილმა განაცხადა“, – აღნიშნა გაბაშვილმა.
მისივე შეფასებით, ხელისუფლება თუ ეკონომიკური კრიზისიდან დაღწევის გეგმას არ გამოიყენებს, „ქვეყანა უფსკრულისკენ სრაფი ტემპით წავა“.