სისხლის სამართლის შესაძლო დანაშაული არჩევნებზე - მოქმედი მოსამართლე პროკურატურისგან გამოძიებას ითხოვს

2026-05-07 13:17:20, 1814 ნახვა

პოლიტიკა

სისხლის სამართლის შესაძლო დანაშაული არჩევნებზე - თეთრიწყაროს რაიონული მოსამართლე, ვლადიმერ ხუჭუა პროკურატურისგან გამოძიებას ითხოვს.

მოქმედი მოსამართლის განმარტებით, 2024 წლის საპარლამენტო არჩევნებთან დაკავშირებით გამოიკვეთა რამდენიმე გარემოება, რომელიც საფუძვლიან ეჭვს იძლევა, რომ არსებობს სხვადასხვა სისხლისსამართლებრივი დანაშაულის ნიშნები.

ვლადიმერ ხუჭუა არ ასახელებს კონკრეტულად რა დანაშაულის ნიშნები დაინახა მან.

მისი განმარტებით, პროკურატურისთვის მიწოდებული ინფორმაცია არ საჭიროებს დიდხნიან გამორკვევას, თუმცა მას პროკურატურიდან მხოლოდ ის უპასუხეს, რომ მიმდინარეობს განცხადების განხილვის პროცესი.

ეს საკითხები შეეხება 2024 წლის საპარლამენტო არჩევნებთან დაკავშირებულ საკითხებს. გამოიკვეთა მთელი რიგი გარემოებები, რომელიც იძლევა საფუძვლიან ვარაუდს იმისთვის, რომ ამ ქმედებებში არის კონკრეტული სისხლის სამართლის დანაშაულების ნიშნები. ამიტომ, მე მივმართე საქართველოს გენერალურ პროკურორს კანონის დადგენილი წესით და ვთხოვე, რომ დაიწყოს დაუყოვნებლივ გამოძიება ამასთან დაკავშირებით.

კონკრეტულ თარიღს მართლმსაჯულების ინტერესებიდან გამომდინარე არ ვიტყვი, თუმცა ეს იყო რამდენიმე თვის უკან, როცა ჩემს მიერ კვლავ გარკვეული გარემოებები გახდა ცნობილი. ეს იყო მიწოდებული კონკრეტული ინფორმაციები, კონკრეტული წყაროები. მომივიდა მხოლოდ და მხოლოდ პასუხი საქართველოს პროკურატურიდან, რომ მიმდინარეობს განცხადების განხილვის პროცესი, რამდენიმე ხნის უკან, მაგრამ მე ვთვლი, რომ ეს საკითხი არ არის ის საკითხი და ჩემს მიერ მიწოდებული განცხადებაში ასახული ინფორმაცია, არ არის ის ინფორმაცია, რომელიც საჭიროებდეს ძალიან დიდი ხნით გამორკვევას იმისა, აქ არის თუ არა შესაძლო დანაშაულის ნიშნები.

მე მიმაჩნია, რომ არსებობს სხვადასხვა სისხლის სამართლებრივი დანაშაულის ნიშნები. მე მიმაჩნია, რომ ეს არის ისეთი ნიშნები, სადაც გამოძიებამ უნდა შეაფასოს და დადოს სამართლებრივი შედეგი," - განაცხადა ვლადიმერ ხუჭუამ.

ვლადიმერ ხუჭუას განმარტებით, თუ ქართველმა ხალხმა აღნიშნულ საკითხზე საბოლოო პასუხი არ მიიღო, ქვეყანაში სააარჩევნო პროცესი ყოველთვის კითხვის ნიშნის ქვეშ იქნება.

ჩემს მიერ მიღებული გადაწყვეტილების სამართლიანობას, კანონიერებას აუცილებლად დაადასტურებს, რაც უფრო მეტი დრო გავა, მით უფრო დადასტურდება ეს და შესაბამისად მე მინდა ვთხოვო ყველას, რომ ეს არის პროცესი, რომელიც შეეხება ყველას, ვისაც აქვს საქართველოში საარჩევნო უფლება, ეს შეეხება საქართველოს მომავალს. აქ არ შეიძლება რომელიმე პირთა ჯგუფის, ან რომელიმე თუნდაც პოლიტიკური აქტორის ინტერესებზე იყოს ეს მიბმული, აქ იგულისხმება ყველა პოლიტიკური სუბიექტი.

სრული პასუხისმგებლობით ვაცხადებ ყველას წინაშე, რომ მე ვემსახურები მხოლოდ სამართალს, სიმართლეს, მართლმსაჯულებას და ჩემი ყველა მიმართვა მიმართულია მხოლოდ ამისკენ. ამას ვინც არ უნდა ეცადოს, შეიძლება გარკვეული პერიოდით ეს არი იყოს ყურადღების ცენტრში, მაგრამ ეს საკითხები ყოველთვის ყურადღების ცენტრში იქნება და რატომ? - ამ საკითხებზე თუ საბოლოო პასუხი არ მიიღო ქართველმა ხალხმა, ყოველთვის ჩვენს ქვეყანაში საარჩევნო პროცესი იქნება კითხვის ნიშნის ქვეშ.

ჩვენ უნდა შევთანხმდეთ ერთ რამეზე ყველა, რომ საარჩევნო პროცესში გამორიცხული უნდა იყოს ყოველგვარი კანონდარღვევა, მანიპულაცია, უსამართლობა," - ამბობს ვლადიმერ ხუჭუა.