თავდაცვის მინისტრმა სამხედროებს ბინები საკუთრებაში გადასცა

2016-03-08 18:55:10, 783 ნახვა

სამხედრო

საქართველოს თავდაცვის მინისტრმა თინათინ ხიდაშელმა საქართველოს შეიარაღებული ძალების 186 სამხედრო მოსამსახურეს ვარკეთილის სამხედრო ქალაქში საცხოვრებელი ბინები საკუთრებაში გადასცა.

აბაშვილის ქუჩის N3-ში მდებარე სამხედრო ქალაქის IX კორპუსში ბინები ამჯერად იმ სამხედრო მოსამსახურეებმა მიიღეს, რომლებსაც საცხოვრებელი ფართით დაკმაყოფილება კონტრაქტის საფუძველზე ეკუთვნოდათ.

„2013 წლიდან მოყოლებული დღემდე დაახლოებით ათასზე მეტ სამხედრო მოსამსახურეს გადავეცით ბინები. დღეს ორასამდე სამხედრო მოსამსახურე იღებს ბინას, მათ შორის 32 დაჭრილი და დაშავებული სამხედრო მოსამსახურის ოჯახი. ბინები გადავეცით ასევე გარდაცვლილი სამხედროების ოჯახებს. რა თქმა უნდა, სპეციალურად დავამთხვიეთ აღნიშნული ღონისძიება რვა მარტს იმიტომ, რომ ეს არა მხოლოდ ჯარისკაცების, არამედ, მათი ოჯახების საჩუქარია. ამ ფორმით გადავუხადეთ მადლობა მათ ცოლებს, დედებს და ქალიშვილებს, ვისი დამსახურებაც არის ამ ბიჭების ასე მხნედ დგომა საკუთარი ქვეყნის სამსახურში. ძლიერი ოჯახების მხარდაჭერის გარეშე ამ ბიჭებს გაუჭირდებოდათ წარმატება. ყველას მინდა მივულოცო დღევანდელი დღე. ეს საჩუქარი დღევანდელი დღის სიმბოლური ნიშანია, მაგრამ, კიდევ უფრო მეტი ადამიანის გახარებისთვის, რა თქმა უნდა, მომავალ რვა მარტს არ დაველოდებით. ორი თვის შემდეგ დაახლოებით 200 სამხედრო მოსამსახურე მიიღებს ბინას, ხოლო წლის ბოლომდე 700-მდე სამხედროს დავაკმაყოფილებთ. ეს პროექტი გაგრძელდება, ვიდრე თავდაცვის სამინისტრო აღებულ ვალდებულებას არ შეასრულებს. ჯამში 1400-მდე ბინაა საჩუქრად გადასაცემი და ეს პროცესი 2017 წელს დასრულდება“, - განაცხადა თინათინ ხიდაშელმა.

ბინების გადაცემის პროცედურის დასრულების შემდეგ თინათინ ხიდაშელმა ვარკეთილის სამხედრო ქალაქში მდებარე V კორპუსი დაათვალიერა. მშენებარე კორპუსში მიმდინარე სამუშაოების შესახებ ინფორმაცია თავდაცვის მინისტრმა მშენებლობის ხელმძღვანელი პირებისგან მოისმინა.