პატივს ვცემ ამ თანამდებობას, თუმცა ჩემი ქვეყანა უფრო მიყვარს,- ამის შესახებ ამერიკის შეერთებული შტატების  პრეზიდენტმა, ჯო ბაიდენმა ოვალური კაბინეტიდან  სატელევიზიო მიმართვისას განაცხადა.

ბაიდენის თქმით, ეს საუკეთესო გზაა ერის გაერთიანებისთვის და რომ დროა, ადგილი ახალ თაობას გადასცენ.

„ბოლო კვირებში ეს ჩემთვის ნათელი გახდა. უნდა გავაერთიანო ჩემი პარტია ამ კრიტიკულად მნიშვნელოვან საქმეში. მჯერა, რომ ჩემი პრეზიდენტის თანამდებობა, ჩემი ლიდერობა მსოფლიოში, ჩემი ხედვა ამერიკის მომავლის შესახებ, ეს ყველაფერი მეორე ვადით არჩევას იმსახურებდა. მაგრამ არაფერი, არაფერი შეიძლება დადგეს ჩვენი დემოკრატიის გადარჩენის გზაზე, მათ შორის ვერც პირადი ამბიციები. ასე რომ, გადავწყვიტე, რომ საუკეთესო გზა ახლა არის ესტაფეტის გადაცემა ახალი თაობისთვის, ახალგაზრდა თაობისთვის. არის დრო და ადგილი საზოგადოებრივ ცხოვრებაში მრავალწლიანი გამოცდილებისთვის. ასევე არის დრო და ადგილი ახალი თაობისთვის, ახალი ხმებისთვის, დიახ, ახალგაზრდა ხმებისთვის. და ეს დრო და ადგილი ახლაა. ეს საუკეთესო გზაა ჩვენი ერის გაერთიანებისთვის“,- განაცხადა ბაიდენმა.

ბაიდენმა აგრეთვე აღნიშნა, რომ არ აპირებს თანამდებობის დატოვებას და მომდევნო ექვსი თვის მანძილზე პრეზიდენტის მოვალეობის შესრულებას გააგრძელებს.

„მომდევნო ექვსი თვე ორიენტირებული ვიქნები ჩემი, როგორც პრეზიდენტის მოვალეობის შესრულებაზე. ეს ნიშნავს, რომ მე გავაგრძელებ შრომისმოყვარე ოჯახებისთვის ხარჯების შემცირებას, ჩვენი ეკონომიკის გაზრდას. გავაგრძელებ ჩვენი პირადი თავისუფლებების დაცვას და ჩვენი სამოქალაქო უფლებების დაცვას, ხმის მიცემის უფლებიდან არჩევანის უფლებამდე. გავაგრძელებ მოწოდებას, რომ ამერიკაში პოლიტიკური ძალადობისთვის, ან რაიმე სახის ძალადობისთვის ადგილი არ არის. ვაპირებ, გავაგრძელო მუშაობა ღაზაში ომის დასასრულებლად. დავაბრუნოთ სახლში ყველა მძევალი და დავამყაროთ მშვიდობა და უსაფრთხოება ახლო აღმოსავლეთში და დავასრულოთ ეს ომი. ჩვენ გავაგრძელებთ ამაყი ქვეყნების კოალიციის შეკრებას, რათა შევაჩეროთ პუტინი და არ ჩავაგდებინოთ ხელში უკრაინა. ჩვენ შევინარჩუნებთ ნატოს უფრო ძლიერს, უფრო ძლიერს და უფრო გაერთიანებულს, ვიდრე როდესმე ყოფილა ჩვენს ისტორიაში”,- აღნიშნა ბაიდენმა.

ავტორი: ექსპრესნიუსი,

სოციალური ქსელები

SOLO და სუხიშვილები წარმოგიდგენთ: "თაკარა" - ვინილი, რომელიც მოძრაობას ბგერად აქცევს

ზახაროვა: თბილისმა მტკიცე და გააზრებული არჩევანი გააკეთა

საქართველოში პატიმრების უპრეცედენტო ზრდაა, - დემოკრატიის კვლევის ინსტიტუტი

კანიე უესტის კონცერტთან დაკავშირებით, მუნიციპალური ტრანსპორტი მგზავრებს გახანგრძლივებული დროით მოემსახურება