რუსეთსა და უკრაინას შორის მოლაპარაკებები, თუ განახლდება, სავარაუდოდ, პირდაპირი იქნება, შუამავლების გარეშე - ეს იქნება საუკეთესო ვარიანტი, - ამის შესახებ რუსეთის საგარეო საქმეთა სამინისტროს დსთ-ს ქვეყნების მეორე განყოფილების დირექტორმა, ალექსეი პოლონჩუკმა TASS-თან ინტერვიუში განაცხადა.

საგარეო უწყების მაღალჩინოსნის თქმით, თუ მოლაპარაკებებში დასავლელი შუამავლები ჩაერთვებიან, ისინი საკუთარი პოლიტიკური და ეკონომიკური მიზნებიდან გამომდინარე იმოქმედებენ.

„თუ და როცა ეს კონტაქტები განახლდება, ისინიც, დიდი ალბათობით, პირდაპირი იქნება - ეს იქნება საუკეთესო ვარიანტი. როგორც პრაქტიკა გვიჩვენებს, დასავლელი შუამავლები, საკუთარი პოლიტიკური და ეკონომიკური ინტერესებიდან გამომდინარე, ცდილობენ, გავლენა მოახდინონ მოლაპარაკებების მსვლელობაზე და მოქმედებენ ისე, რომ არ გადაწყდეს კონფლიქტი... აქამდე უკრაინელებთან მხოლოდ უშუალოდ გვქონდა კომუნიკაცია იმ პლატფორმების გამოყენებით, რომლებიც მოწოდებული გვქონდა, რასაც ძალიან ვაფასებთ. გასული წლის თებერვალ-აპრილში, რუსეთ-უკრაინული დიალოგის სამი რაუნდი გაიმართა ბელარუსში, ერთი კი თურქეთში. თითქმის ყოველდღიური კონტაქტები ხდებოდა ვიდეობმულით - ეს იყო პირდაპირი მოლაპარაკებები უკრაინელებთან", - აცხადებს პოლონჩუკი.

შეგახსენებთ, რუსეთის მიერ უკრაინაში სრულმასშტაბიანი ომის დაწყების შემდეგ, ორ ქვეყანას შორის მოლაპარაკების რამდენიმე უშედეგო რაუნდი გაიმართა. მას შემდეგ, რაც რუსეთის პრეზიდენტმა უკრაინის ოთხი ოკუპირებული რეგიონის ანექსიის შესახებ განკარგულებას მოაწერა ხელი, ვლადიმერ პუტინმა უკრაინელებს მოლაპარაკების მაგიდასთან დასხდომისკენ მოუწოდა და განმარტა, რომ რუსეთი უკრაინასთან მის შემადგენლობაში შესული ტერიტორიების შესახებ აღარ ისაუბრებდა, რადგან ხალხმა "თავისი არჩევანი უკვე გააკეთა".

გასული წლის 30 სექტემბერს, უკრაინის პრეზიდენტმა დაამტკიცა ეროვნული უშიშროებისა და თავდაცვის საბჭოს გადაწყვეტილება, რომლის თანახმადაც, უკრაინა რუსეთის ფედერაციის პრეზიდენტთან მოლაპარაკებებს ვერ აწარმოებს. ოქტობრის ბოლოს, რუსეთის საგარეო საქმეთა მინისტრმა, სერგეი ლავროვმა განაცხადა, რომ ვლადიმერ პუტინი უკრაინასთან მოლაპარაკებებისთვის კვლავაც მზად იყო. ნოემბრის დასაწყისში, „დიდი ოცეულის“ სამიტზე ზელენსკიმ „მშვიდობის ფორმულაზე“ ისაუბრა, რაზეც ლავროვმა თქვა, რომ „კიევის მიერ შემოთავაზებული ფორმულის საფუძველზე, მოსკოვი არავისთან საუბარს არ აპირებს“.

ავტორი: ექსპრესნიუსი,

სოციალური ქსელები

უკრაინამ ექვს თვეში გააორმაგა განადგურებული რუსული საჰაერო თავდაცვის სისტემების რაოდენობა.

უკრაინის ზაკარპატიის რეგიონზე დრონებით თავდასხმის გამო უნგრეთის საგარეო საქმეთა სამინისტრომ რუსეთის ელჩი დაიბარა

ალექსანდრიის პატრიარქი შიო III-ს: გილოცავთ და თქვენი დღეგრძელობისთვის ვლოცულობთ

ირაკლი შაიშმელაშვილმა აშშ-ში პოლიტიკური თავშესაფარი მიიღო