საქართველოს ავიაბაზარზე საუდის არაბეთის ავიაკომპანია „Flyadeal" - ის შემოსვლასთან დაკავშირებით მოლაპარაკება მიმდინარეობს - დღეს არაბული ავიაკომპანიის ხელმძღვანელ გუნდთან ონლაინ შეხვედრა გამართა ეკონომიკისა და მდგრადი განვითარების მინისტრის მოადგილე მარიამ ქვრივიშვილმა, სადაც განხილულ იქნა საქართველოს ბაზარზე ავიაკომპანიის  საქმიანობის დეტალები. ამის შესახებ ინფორმაციას ეკონომიკის სამინისტრო ავრცელებს

უწყების ცნობით, საქართველოს უსაფრთხოების მაღალი დონე, სწორი პოზიციონირება, ოთხ სეზონურობა და მიმზიდველი ტურისტული პროდუქტები - სწორედ ამ მიზეზების გამო ინტერესდება ავიაკომპანია საქართველოში ოპერირებით. შეხვედრაზე აღინიშნა, რომ რამდენიმე დღეში საუდის არაბეთის ავიაკომპანიის დელეგაცია საქართველოს ეწვევა. მოლაპარაკების წარმატებით დასრულების შემთხვევაში, თბილისისა და ბათუმის მიმართულებით საუდის არაბეთის სამი ქალაქიდან პირდაპირი ფრენები დაინიშნება.

„აქტიურად ვაწარმოებთ მოსამზადებელ სამუშაოებს ზაფხულის ტურისტული სეზონის სათანადო დონეზე წარმართვისთვის. ჩვენთვის მნიშვნელოვანია, რომ მიმდინარე ზაფხულის სეზონზე გვყავდეს მეტი მხარჯველუნარიანი ტურისტი, მათ შორის, ევროკავშირისა და ყურის ქვეყნებიდან. ჩვენ ვაწარმოებთ ძალიან მნიშვნელოვან მოლაპარაკებას საუდის არაბეთის ავიაკომპანია „Flyadeal" - თან, რათა მათ დაიწყონ პირდაპირი საჰაერო მიმოსვლა საუდის არაბეთის სამი ქალაქიდან თბილისისა და ბათუმის საერთაშორისო აეროპორტებში. საუდის არაბეთი ჩვენთვის ერთ-ერთი ყველაზე სტრატეგიულად მნიშვნელოვანი სამიზნე ქვეყანაა, საიდანაც წლების განმავლობაში მრავალი მხარჯველუნარიანი ტურისტი ჩამოდის," - განაცხადა მარიამ ქვრივიშვილმა.

მისი თქმით, საქართველო, როგორც ტურისტული მიმართულება, საუდის ბაზარზე პოზიციონირდება როგორც უსაფრთხო, სტუმართმოყვარე და ოთხსეზონიანი ქვეყანა.

„იმედს გამოვთქვამ, რომ ყოველივე ხელს შეგვიწყობს მიმდინარე მოლაპარაკების წარმატებით დასრულებაში და საქართველოს ბაზარზე კიდევ ერთ საერთაშორისო ავიაკომპანიას ვიხილავთ," - აღნიშნა მინისტრის მოადგილემ.

აღსანიშნავია, რომ საქართველოს ავიაბაზარზე უკვე ოპერირებს ერთი ავიაკომპანია  FLYNAS საუდის არაბეთიდან,  რომელიც ახორციელებს კვირაში 26 სიხშირით თბილისისა და ბათუმის მიმართულებით.

საუდის არაბეთი საქართველოს ერთ-ერთი სტრატეგიული ტურისტული ბაზარია. ამ ქვეყნიდან ტურისტული ნაკადები ზრდადი დინამიკით ხასიათდება. 2022 წელს, საქართველოში 62 პროცენტით მეტი ტურისტული ვიზიტი განხორციელდა 2019 წელთან შედარებით, ხოლო 2021 წლის ანალოგიურ პერიოდთან მიმართებაში ზრდამ 30,848 პროცენტი შეადგინა.

ავტორი: NS (სტატია დაფინანსებულია),

სოციალური ქსელები

რომის პაპი ჟურნალისტებს - მიხარია, რომ აქ ხართ, კარგი გაშუქება ყველგან და ყველასთვის მნიშვნელოვანია

თიბისი კონცეპტის მხარდაჭერით ამირ კაკაბაძის საიუბილეო წიგნი გამოიცა

Transparency International Georgia - მიხეილ სააკაშვილის სახელი შეტანილი იქნება ჩვენი ორგანიზაციის მიერ შედგენილი პოლიტიკური პატიმრების სიაში

რუსეთი სამშენებლო კომპანიების გაკოტრების ტალღამ მოიცვა