რუსთაველის გამზირზე ავტოსაგზაო შემთხვევის შედეგად დაშავებული გოგონას მდგომარეობა სტაბილურია

2015-09-26 14:34:25, 570 ნახვა

პოლიტიკა

თბილისში, რუსთაველის გამზირზე მომხდარი ავტოსაგზაო შემთხვევის შედეგად დაშავებული გოგონას მდგომარეობა სტაბილურია.

ამის შესახებ „ექსპრესნიუსს“ სასწრაფო დახმარების საზოგადოებასთან ურთიერთობის სამსახურში განუცხადეს.

მათივე ინფორმაციით, გოგონა ქვემო კიდურის და ქალა ტვინის ტრავმით ამტელ ჰოსპიტალშია გადაყვანილი.

შინაგან საქმეთა სამინისტროს ცნობით, მომხდარზე გამოძიება სსკ-ის 276-ე მუხლის 1 ნაწილით მიმდინარეობს (ავტომობილის, ტრამვაის, ტროლეიბუსის, ტრაქტორის ან სხვა მექანიკური ტრანსპორტის მოძრაობის უსაფრთხოების ან ექსპლუატაციის წესის დარღვევა იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება).

მსუბუქი ავტომობილი ახალგაზრდა გოგონას თბილისში, რუსთაველის თეატრის მიმდებარე ტერიტორიაზე დაეჯახა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან