2015-09-11 12:44:21, 546 ნახვა

---

თბილისის მერიის განათლების, სპორტისა და ახალგაზრდულ საქმეთა საქალაქო სამსახურის უფროსი გივი კუბლაშვილისგან ბოდიშის მოხდას ითხოვს

დედაქალაქის მერიაში განათლების, სპორტისა და ახალგაზრდულ საქმეთა საქალაქო სამსახურის უფროსმა გიორგი არეშიძემ ბრიფინგი გამართა. არეშიძის განცხადებით, ბოლო დღეების განმავლობაში მის მიმართ გაჟღერებული ბრალდებები არის სრულიად უსაფუძვლო და ნაციონალური მოძრაობა, ე.წ. არასამთავრობო ორგანიზაციების სახელით, მისი და მისი ოჯახის მიმართ მიზანმიმართულ დისკრედიტაციას ახორციელებს.

„თბილისის მერიის მხრიდან ბანაკის ორგანიზებისთვის გადარიცხულ თითოეულ ლარზე  ვარ პასუხისმგებელი. საკითხთან დაკავშირებით,  დაინტერესებულ პირებს შემიძლია დეტალური ინფორმაცია მივაწოდო. ამასთან , ხაზგასმით მინდა აღვნიშნო, რომ ბანაკის ორგანიზებისას, სამართლებრივ ნაწილში, კანონის დარღვევასთან, მინიმალურ გადაცდომასთანაც კი საქმე არ გვქონია. რაც შეეხება შინაარსობრივ ნაწილს, ბანაკმა ჩაიარა იდეალურად და სწორედ, ეს გახდა ნაციონალური მოძრაობის გაღიზიანების მიზეზი - ისინი გამუდმებით ცდილობენ, დედაქალაქის მთავრობის მიერ განხორციელებულ ყველა წარმატებულ პროექტს მსგავსი მეთოდებით დაუპირისპირდნენ“ - განაცხადა გიორგი არეშიძემ.

 თბილისის მერიის განათლების, სპორტისა და ახალგაზრდულ საქმეთა საქალაქო სამსახურის უფროსის განცხადებით, გაჟღერებული ვერსია, თითქოს, მან ხელშეკრულება  მეგობარს გაუფორმა, სიცრუეა და არეშიძე გივი კუბლაშვილისგან ბოდიშის მოხდას ითხოვს.

„ბუნებრივია, მყავს ძალიან ბევრი ნაცნობი, ახლო ადამიანი, მეგობარი და საქმიანი კავშირები არასოდეს ყოფილა ამ ურთიერთობების ხელისშემშლელი ფაქტორი. თუნდაც, ბანაკში მე გავიცანი ძალიან ბევრი კარგი ახალგაზრდა,  ზოგიერთ მათგანთან დავმეგობრდი კიდეც -  ბუნებრივია, სამომავლოდ ეს ვერ გახდება მათთან საქმიანი კავშირების გამორიცხვის მიზეზი “ - განაცხადა არეშიძემ.

 ამასთან, როგორც განათლების, სპორტისა და ახალგაზრდულ საქმეთა საქალაქო სამსახურის უფროსის მიერ დედაქალაქის მერიაში გამართულ ბრიფინგზე გახდა ცნობილი, გიორგი არეშიძე ხვალ მედიის წარმომადგენლებს შეხვდება. პრესკონფერენციაზე არეშიძე ბანაკის შინაარსობრივ, სამართლებრივ და ფინანსურ მხარეებს დეტალურად განიხილავს და მედიის წარმომადგენლების კითხვებს უპასუხებს. 

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი